Fernando Vázquez Cárcaba y María Carballo quedaron a pre na primer posición, qu’a la fin ocupó la gaitera gallega

Los gayasperos asturianos nun pudieron algamar a la ganaora: Daniel Meré, Francisco Fernández Álvarez y Fabián Fernández Fernández quedaron detrás de Fernando Vázquez Cárcaba, veteranu nel MacCrimmon lorientés que yá quedare na 6ª y 3ª posición notres ediciones y qu’esti añu algamó la 1ª xuntu con María López Carballo. Sicasí, el reglamentu establez que prima la mocedá del gaiteru en casu d’empate, y la gallega, de malapenes 15 años, lleva’l premiu pa casa na edición del Festival Intercélticu d’An Oriant, dedicada esti añu al país vecín.

Y ye que la coruñesa ye una virtuosa de la música tradicional. Con namás seyes años entamó los sos estudios musicales na Escuela Música Bellón Maceiras. Dende entós tiense formao en zanfona amás de gaita gallega, que siempres que pue perfeiciona colos meyores mayestros musicales. Nel casu del MacCrimmon, preparó les pieces musicales asturianes con Rodrigo Joglar y tien tocao con Carlos Núñez y Susana Seivane, polo que promete munchos y mui bayurosos años de música.

Pero Vázquez Cárcaba nun queda cola pena. El de Llieres finó yá los sos estudios de Musicoloxía pola Universidá d’Uviéu y dirixe dende l’añu pasáu la Banda Gaites Conceyu Siero. Al marxe de tolos premios algamaos en concursos asturianos, tamos ciertos de qu’esti nun sedrá’l postrer añu que de guerra nel MacCrimmon.

Aymara González Montoto

This work is licensed under a Creative Commons Attribution 4.0 International License.