• Portada
  • >
  • Asturies
  • >
  • Andecha Astur valora la presidencia de Barbón comu “El lifting imposible del PSOE n’Asturies”

Andecha Astur valora la presidencia de Barbón comu “El lifting imposible del PSOE n’Asturies”

  • 6 Agostu, 2019

Andecha Astur fae una perdura valoración del recién naguráu gobiernu asturianu con Adrián Barbón al frente nun contundente documentu d’once páxines nel que se fae un percorríu pel pasáu y presente d’Asturies, del presidente, del partíu nel poder, de la responsabilidá que tienen na situación actual y de la corrupción endémica que los acompanga. El conteníu del documentu ta tamién recoyíu en 4 vidios nos que miembros de la Xunta Executiva dan la so valoración

La primer valoración que fae’l partíu ye positiva: pa aportar a onde ta Barbón tuvo de renunciar al so pasáu recién, cola hestoria conocía del PSOE-SOMA -que lu auparon a onde ta- y colos sos últimos cabezaleros. “El gran trunfu de la sociedá asturiana ye que’l PSOE tuvo d’arrenunciar a siguir visibilizando’l so antiasturianismu militante y tuvo de renegar de los compañeros implicaos na corrución. Tuvo de facelo porque la sociedá asturiana ganó la batalla social de desmazcaritar al PSOE, mesmamente escontra l’ablanquiamientu que siempres-y facilitaron IU y Podemos.”

Sicasí, albidren que nun va haber munchu cambiu y que la continuidá del PSOE implica la continuidá cola llínia de xestión neolliberal capitalista y centraliega que llevó a Asturies a la situación na que s’alcuentra.

Ven na política de xeitos de Barbón una estratexa de resetéu de la memoria coleutiva asturiana na que se fae por separtar a Barbón del pasáu de corrución, desindustrialización, paru, crisis demográfica, represión llingüística, discriminación competencial… que representa’l PSOE.

Poro, pidin al Pueblu Asturianu que nun escaezan les consecuencies de la xestión del PSOE sobre Asturies: Ente 1981 y 2019 el país perdió 106.886 habitantes, lo que representa una perda del 9,45%, batiéndose nel 2018 por segundu añu consecutivu el récor ñegativu de ñatalidá, cola tasa más baxa de tol Estáu español por 35 años consecutivos (el documentu fae equi un interesante y fondu analís de los datos demográficos y llaborales).

Na valoración d’Andecha recuéyense tamién dellos momentos nos que l’antiasturianismu militante del PSOE quedó n’evidencia, dende la imposición d’un estatutu de tercera que nun se permitió votar, pasando polos votos en contra que permitirién reformes estatutaries y la Oficialidá del asturianu y les oportunidaes perdies d’algamala en toes y cauna de les llexisllatures nes que gobernaron (en toes cuntaron en dalgún intre colos 27 diputaos/es d’estremaes fuercies que se dicíen favoratibles a la oficialidá).

No que cinca a indicadores económicos, Asturies ye l’únicu territoriu del Estáu que nun pudo doblar el so PIB de magar el 1977, con más del 75% de los emplegos nel seutor servicios y namás el  4% de los contratos indefinios; mentres nel Reinu d’España la tasa paru amenorgó un 1,26% nel caberu añu, n’Asturies xorreció más d’un puntu y supera nuna décima a la de tol Estáu. En resume, el llegáu del PSOE n’Asturies inclui “altu índiz de paru, mocedá forciao a emigrar, salarios más baxos, precariedá llaboral, drama demográficu, pieslle la minería, desindustrialización, amenorgamientu’l seutor pesqueru, reducción del seutor agroganaeru, monocultivu ocalital nos montes, altos niveles de contaminación atmosférico, sobroesplotación turístico de dalgunes fasteres, ruinu desenrollu de la rede comunicaciones, escaezu identitariu, represión llingüística, amenorgamientu de la rede sanitaria pública, redución de la ufierta nel enseñu públicu…”

Nesta situación Andecha fala d’etnocidiu, términu del etnólogu francés Robert Jaulin (1928-1996) col que define la situación de los pueblos orixinarios d’un territoriu que foron desaniciaos, sometíos o desplazaos por un pueblu dominaor, que se considera culturalmente superior.

P’Andecha Astur, les causes principales d’esta situación tan grave son les reconversiones industriales que se carecieron de la man del PSOE, la baxa tasa d’actividá y la perda población.  Ensin escaecer la corrupción que vieno de la man del mesmu partíu: Casu Villa, casu Riopedre, casu El Musel, casu El Musel/A ver la ballena, casu Renedo, casu Niemeyer, casu Cuideiru, casu Ayer, casu Grandas de Salime, casu Pokemon, casu La Camocha, casu UGT-cursos de formación, la trama’l cable… una llarga llista que convirtió Asturies nun escenariu pa les fechoríes impunes d’una “casta política mafiosa”.  Barbón asistió a toos estos casos ensin abrir la boca pa denuncialo política, xudicial o públicamente, fechu silenciáu cola complicidá de lomedios de comunicación, IU y Podemos, principales ablanquiadores del papel que Barbón ya’l PSOE xugaron en tou esto.

 

Y pa qu’esto nun s’escaeza el documentu de valoración recueye una biografía política del presidente y de los sos 25 años en cargos de responsabilidá, nos que foi bon discípulu de Fernández Villa en plena “fiesta” de los fondos mineros. “Nin el PSOE, nin los poderes táuticos nin mediáticos, lu puen presentar agora comu exemplu de ciudadanu ensin antecedentes, d’home desinteresáu qu’aporta a la primer llínia comu espresión d’una nuea política y que mos va rescatar del desastre”.

Darréu de la de Barbón, la valoración inclui un repasu a les biografíes d’otros de los componentes del actual gobiernu, comu la de Juan Cofiño, actual vicepresidente y conseyeru d’Infracadarmes, Mediu Ambiente y Cambeu Climáticu, Rita Camblor, conseyera de Presidencia, Enrique Fernández, conseyeru d’Industria, Emplegu y Promoción Económico, Alejandro Calvo, conseyeru de Desendolcu Rural, Agroganadería y Pesca, Borja Sánchez, conseyeru de Cencia, Anovación y Universidá, Melania Álvarezon, conseyera de Drechos Sociales y Bientar … toos ellos persones del aparatu de la FSA demientres los años de corrupción y clientelarismu.

Mención aparte faen de Berta Piñán (conseyera de Cultura, Política Llingüística y Turismu), quien “Quedaría contentísima de dexar una infracadarma, desendolcando la Llei d’Usu, pa que cuandu llegue’l momentu la oficialidá seya una simple transición consensuá y serena”. Ello ye, qu’arrenuncia a la oficialidá que vendieron en campaña, llendándose a desendolcar la Llei d’Usu y Promoción del Bable/Asturiano, de 1998: una vuelta atrás de 20 años na que la única diferencia visible ye que la presión del Pueblu Asturianu nun permite al gobiernu continuar amosando a les clares el so antiasturianismu radical.

P’Andecha Astur, que’l PSOE asuma agora lo qu’asocede n’Asturies en materia demográfica  -depués de 36 años de gobiernu del PSOE estrozando l’Asturies productiva- ye otru de los llogros de la sociedá asturiana.”Cuandu Barbón convierte en prioritariu’l que noma “retu demográficu” y lu pon comu competencia de la Conseyería de Presidencia, ta reconociendo que Tini Areces y el PSOE mentíen cuandu calificaben de “llendes urbanes” a les moces y mozos asturianos emigraos a la fuercia”.

A mou de conclusión Andecha Astur recalca que nun aceuten “nin símbolos, nin xestos. A Adrián Barbón y al PSOE vamos desixi-yos fechos. Fechos comu los que recueyen los puntos mínimos aprebaos nel nuesu caberu Conceyu Nacional”.

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies