La naguración continuó  a pesar de les protestes, pente traxes y corbates, canapés y parafernalia, blindaos ensin dubia pola tranquilidá que da el poder subise los sueldos a voluntá, mentantu nel esterior los xilecos mariellos, los pensionistes, los trabayaores en llucha, los paraos ya en resume el Pueblu Asturianu reclamaba una vida digno

A les seies de la tardi delles personalidaes del entornu políticu ya empresarial averáronse a la FIDMA pa inagurar cola so presencia la so 63 edición. A la entrada alcontráronse, comu ya vien siendo vezu nes caberes ediciones, con representantes de decenes de coleutivos descontentos cola so xestión.

La ministra de Sanidá, Consumu y Bientar Social en funciones  María Luisa Carcedo, el presidente del “Principado”, Adrián Barbón; l’alcaldesa de Xixón, Ana González, ya’l presidente de la Cámara de Comerciu de Xixón, Félix Baragaño, foron recibios a les puertes de la Feria Internacional de Muestres de Xixón por cientos de persones d’estremaos coleutivos que, coles sos pancartes y les sos voces yos remembraben les promeses incumplies, los drechos ñegaos, los trabayos perdíos, la falta de llibertá y la precariedá llaboral y vital que se carez nel país.

Como tamién ye vezu, la presencia policial y les valles torgaben el contautu direutu de los ciudadanos colos sos gobernantes, calteniéndolos separtaos ya impidiendo l’acesu a la esplanada d’entrada a la Feria, lo que nun foi a evitar que les voces de los allí concentraos aportaren con claridá a los sos destinatarios: la llei mordaza, les reformes llaborales cola so consiguiente perda de drechos, los ERES, preslles y privatizaciones, la emigración, la precariedá llaboral… demandes ante les que los aludios nun fexeron dalu xeitu, ignorando dafechu a los presentes.

Nuria Prendes

This work is licensed under a Creative Commons Attribution 4.0 International License.