Ya pue vese online la película “Los viaxes de Gulliver” nel espaciu de Vimeo fechu pola Escuela de Doblaxe d’Asturies
Producida polos Estudios Paramount, foi la primera del xéneru que nun taba venceyada a los Estudios Disney. Dirixóla Dave Fleischer y tuvo como productor al so hermanu Max Fleischer, dos pioneros del cine de dibuxos animaos que nos años 40 diben ser bien populares polos sos curtiumetraxes sobre “Superman”.
Los guionistes Dan Gordon, Cal Howard, Tedd Pierce, Edmond Seward ya Izzy Sparber, encargáronse de facer esta adautación parcial de la novela clásica homónima del irlandés Jonathan Swift , que nel so pasu a la pantalla grande centrábase na aventura de Gulliver na tierra de Lilliput, un país habitáu polos liliputienses, unos seres que miden una doceava parte menos que los humanos del mundu conocíu. Poro, pa ellos Gulliver ye un xigante al qu’amarren dempués d’atopalu inconscinente. Cuando recupera’l conocimientu y llogra desatase ensin nenguna dificultá, acabará faciendo de mediador mientres una guerra qu’enfrenta a dos reinos del llugar. Amás d’ello, el Príncipe David, perteneciente a ún d’estos reinos, enamórase de la Princesa Gloria, fía del rival del so padre.
Dobláu al asturianu en 2010 editóse al añu siguiente nun DVD qu’incluyía en “Featurettes” dos pequeños programes d’entrevistes, “El doblaxe n’Asturianu” y “Los viaxes de Jonathan Switf”, onde apaecíen ente otros los escritores Xuan Xosé Sánchez Vicente, Vicente García Oliva y Alberto Álvarez Peña. Illán Gonzali dirixó y produció’l versionáu, siendo “Los viaxes de Gulliver” el llargumetraxe d’animación que primero se dobló al asturianu. El doblaxe estrenóse’l 23 d’avientu de 2010 nel CMI de L’Arena, en Xixón.
Illán Gonzali, per aciu la so productora, tien doblao yá amás d’ésti un bon númberu de títulos en llingua asturiana, seya pal mercáu videográficu como «La nueche de los muertos vivientes», «El tercer home», «McLintock», «Diez negrinos», munchos de los que podemos esfrutar en vimeo, y les series d’animación «Popeye», «Supermán» y «El Picatueru (Woody Woodpecker)», o seya pa la so emisión na TPA como les películes «Harry el suciu», «Orixe», «Ocean’s Eleven» o «Sherlock Holmes: Xuegu de Solombres».
Redaición InfoAsturies
This work is licensed under a Creative Commons Attribution 4.0 International License.
