La Universidá d’Uviéu nun cubre les necesidaes de la mocedá  y fai que los  estudiantes asturianos tean d’escoyer pente emigrar pa estudiar o renunciar  a la formación que quien

8.237 asturianos tuvieron de renunciar al so suañu d’estudiar un gráu de salú n’Asturies; la nota de corte pa cursar melecina ye la más alta. Al mesmu tiempu, les alministraciones insisten na falta de mélicos n’Asturies y llancen alertes sobro’l pelligru de la emigración de la mocedá.

Pal partíu nacionaliegu Andecha Astur esta ye una actitú cínica cola que traten d’esconder la política de despoblación y desdexamientu nel que los partios españoles tienen somorguiada a Asturies “Nun tien xacíu qu’al mesmu tiempu que l’alministración se llamenta por falta de mélicos y s’amparen nesa supuesta escasez de personal formáu pa tener desantendía la sanidá asturiana, les places na facultá Melecina d’Uviéu  y tamién les places del MIR asturianu tean llendaes mui perbaxo de la demanda de los estudiantes”.

Denuncien que la Universidá d’Uviéu ta infrautilizada, “poques places, puntuación desaxerada pa entrar, y estudiantes asturianos que tienen qu’emigrar a otres facultaes con menos dificultá pal acesu. Esa ye l’Asturies que mos dexa’l Reinu d’España y los sos secuaces del “Principado” declaró Llucía Fernández en nome d’A.A.

Nuria Prendes

This work is licensed under a Creative Commons Attribution 4.0 International License.