El Ministeriu Español de Política Territorial y Administración Pública pretende entregar a Lleón 674 hectárees de praos somedanos

La guerra de la pación pente’l conceyu asturianu de Somiéu ya’l municipiu lleonés de Cabrillanes afeuta a cerca de 700 hectárees que fasta agora yeren zona de pación somedanés pero qu’agora, acordies la cabera resolución del Ministeriu de Política Territorial y Administración Pública del Estáu Español, pasarien a pertenecer a Lleón.

La llucha polos terrenos, na que Somiéu ya perdiere 185 ha nel 2003, ye una cuestión d’aprofitamientu ganaderu y d’aides europees, ya que’l 65% d’esta superficie ye suscetible de recibir ayudes de la Política Agraria Común. Somiéu caltién 6 ganaderies, con un censu de mil cabeces de ganao mayor, pero amás d’estes, los rebaños de los vaqueiros dependen tamién de la pación del puertu pente los meses de Mayu a Payares.

Tanto’l Gobiernu d’Asturies comu’l Conceyu de Somiéu recurrieron esta decisión, qu’ agora ta en manes de l’Audiencia Nacional española que sedrá quien decida los drechos d’usu de los praos. Pel intre, y mentantu nun se resuelva la situación, la cesión de los praos a los lleoneses ta paralizada, polo qu’esta temporada el ganáu somedán podrá pacer tranquilamente nellos.

Nuria Prendes

This work is licensed under a Creative Commons Attribution 4.0 International License.