El 40% de les ufiertes d’emplegu xestionaes por Infojob n’Asturies correspuenden a Comercial y ventes y atención al veceru, siendo la modalidá de contratu más espardía la de “duración determinada”, abondando los contratos a tiempu parcial

Los datos estudiaos correspuenden al pasáu mes de Xunu, nel que’l 32% de tolos emplegos ufiertaos foron pa puestos de “Comercial y ventes”, ya otru 8% pa trabayos de “Atención al veceru”.  El problema d’estos contratos ye la precariedá qu’impliquen, siendo los primeros inestables, ensin horariu fixu y dependientes dafechu del volume de ventes consiguies y los segundos mui venceyaos a la estacionalidá braniega. De fechu, les demandes de “comerciales” duplicáronse demientres la crisis, afalaes pola urxencia d’alcontrar trabayu ensin emportar les condiciones: les empreses tan pola llabor de contratar autónomos que “cobren en función de lo que vendan”, llibrándose del pagu de la seguridá social y de tener que caltener un puestu fixu. Nesti ámbetu el 99% de los contratos son de calter mercantil y non llaboral.

Sicasí, acordies l’informe, Asturies nun ufre una proporción grande de puestos de trabayu venceyaos al turismu, daqué que tien dos posibles desplicaciones: o bien el turismu nun apurre tantu emplegu comu se pensaba o bien estos emplegos -especialmente dientro’l ramu la hostelería- úfrense per otros canales.