Una Selmana Prieta y revindicativa

  • 8 Xunetu, 2019

Perbaxo la noria, l’arume a pataca asao ya’l baturiciu de los chiringos y coches de choque trescurre la vraera Selmana Prieta, la que caltién parte del enfotu social y cultural col que ñaciera esti eventu

El tren de la Selmana Prieta foi recibíu poles Asamblees de Trabayadores en Llucha, qu’espusieron y visibilizaron dalgunos de los estremaos conflictos llaborales y sociales vixentes, amosando una rialidá de l’Asturies que pelea contra los dispidos, los preslles d’empreses, les privatizaciones, los retayos, la criminalización de la protesta ya les inxusticies sociales. Los presentes aprofitaron la ocasión p’amosar tamién, de manera espontanea, la so refuga a les “autosubies de sueldos”, glayando ante l’alcaldesa de Xixón ya otros cargos municipales presentes na naguración “Menos subies, más emplegos”.

Darréu, la charanga Ventolín, conocía pola so revindicación internacionalista, solidaria y republicana, protagonizó un pasucais pela feria, aparando na haima saharaui y xuniendo nuna mesma les revindicaciones de los pueblos asturianos, colombianos, palestinos, saharauis, sirios ya en resume, del mundiu enteru.

Tamién dientro la programación oficial podemos alcontrar, arriendes de la presentación de decenes de llibros, dellos actos de marcáu calter de denuncia y/o revindicativu, comu foi la participación d’Asturies Llaica, qu’analizó la cadarma del estáu español, la so relación cola ilesia católica y la necesidá de crear un estáu vraeramente llaicu que permita l’avance social ensin privilexos nin torgues propios de sieglos pasaos.

Nos prósimos dies, dientro de la programación, podrán sentise la voz de les muyeres en llucha, los refugiaos colombianos n’Asturies, l’Observatoriu de menores desapaecios o la denuncia contra la uberización como normalización de la precariedá, pente otros munchos eventos que se pueden consultar nel programa de la Selmana Prieta.

Nuria Prendes

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies