Plantación illegal d’ocalitos en Cuideiru

  • 26 Xuño, 2019

Seique l’ocalitu, especie de rápidu xorrecimientu, invasora, escosaora del tarrén y propiciaora d’incendios ya supero va tiempu la llende de 61.838 hectárees de superficie fixaes comu tope pol Plan Forestal d’Asturies pal añu 2060, el PSOE continúa consintiendo la colonización ocalitera, en beneficiu de la multinacional papelera y los maereros

La Coordinadora Ecoloxista d’Asturies denuncia ante la Conseyería de Desendolcu Rural una plantación illegal d’ocalitos na vega del Ríu Ferrera, Arteu, nel conceyu de Cuideiru. Alvierten que’n toa Asturies tan dándose casos de llantaos illegales d’esta dañina especie, ensin que s’apliquen les correspondientes midies llegales, o incluso col consentimientu de les alministraciones. Nel camín, el desaniciu de la viesca autóctono, la destrución d’ecosistemes, los animales desplazaos ya’l suelu agostáu, malu de recuperar una bones el cultivu s’abandona por dexar de ser rentable.

La cantidá de nutrientes que precisa pal so rápidu xorrecimientu, l’usu de yerbicides ya les tales a matarrasa ca doce años prevoquen graves procesos d’erosión ya esgotamientu del suelu asturianu, l’altu consumu d’agua precisu pa producir en pocu tiempu grandes cantidaes de biomasa daña’l sistema acuiferu y  al ser un gran monocultivu de miles y miles de hectárees,  prevoca que la fauna preesistente nun seya quien a adautase al nuevu hábitat, desapaeciendo o desplazándose a fasteres poblaes por humanos y xenerando los conflictos que conocemos colos ganaderos. Lo mesmo ocurre coles especies vexetales que van progresivamente desapaeciendo ante la voracidá del ocalital, ensin escaecer la inflamabilidá de la especie ya’l so efeutu propagaor nos ca vegada más avezaos incendios forestales.

“Nun pue tolerase que seya’l lobby l’ocalitu’l que dicte la política y la planificación forestal d’Asturies, atendiendo esclusivamente a los sos porgüeyos comerciales, ensin tener en cuenta criterios sociales, mediuambientales o de planificación económica xeneral. Nun pue tolerase que’l Gobiernu Asturianu se plegue a les sos presiones, por mui poderosu que seya esti lobby, ya que perriba de los intereses particulares tien d’imperar l’interés xeneral, ya l’interés xeneral nun ye tornar la costa asturiana nun monocultivu d’ocalitos”, declaren dende la CEA.

Poro, desixen que se decrete una moratoria xeneral nel llantáu d’ocalitos, una y bones ya s’algamó la llende fixao pol Plan Forestal y esperen que nesta llexisllatura s’intensifique la xixilancia, sancionándose a los que llanten ensin permisu y se retiren tolos llantaos illegalmente.

Redaición InfoAsturies

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies