Na segunda ronda de contautos colos grupos de la oposición a la gueta d’alcuerdos pal repartu de recursos na nueva corporación llocal, la conceyala de Facienda y portavoz del gobierno municipal, Marina Pineda, ufrió un sueldu más a los grupos municipales con tres conceyales -Foro, Podemos y PP-. Como si d’una subasta se tratare, el PSOE sube l’apuesta y si nel primer aconceyamientu ufría a ca un los fondos equivalentes a lliberar a un conceyal (lo mesmo qu’a VOX ya IU) reservando diez lliberaciones pa ellos y dos pa Ciudadanos, agora, ensin menguar los de so nin los de C’s, ufre un salariu más a los tres anantes nomaos. Eso si, cola condición de que’l segundu salariu se reparta pente dos conceyales, de manera que tolos conceyales de Foro, Podemos y PP tendríen la so paguina. Pineda tamién propuso a estos partíos medrar la so dotación pa gastos de personal qu’ufriere la selmana pasada.

Les uniques integrantes de la Corporación ensin nómina fixa del Plenu pasaríen a ser les dos conceyales de C’s que continuarán colos sos respeutivos trabayos y la socialista Carmen Saras, única edil del PSOE que nun tará lliberada, pero que previsiblemente tará al frente d’EMA y Emulsa, cobrando dietes por cada reunión. De fechu, pa dar cabida a tolos partios con representación municipal y que naide nun s’enfade, crearánse nuevos puestinos nos Conseyos d’Alministración d’Emulsa, EMA y EMTUSA.

Pente lliberaciones totales y parciales, pagaráse l’equivalente a 19 nómines de 58.600 euros ca una, más la de l’alcaldesa, lo que sumao a l’aumentu de sueldos da comu resultáu un gastu de 90.000 € añales más que na llexisllación anterior.

Llucía F. Marqués