Conocer Xixón de la man de los escritores que lu escoyeron comu escenariu pa les sos noveles y al tiempu sofitar a la reciella, adolescencia y families en riesgu de dixebra y probitú ye’l retu d’esti mes nes Visites Solidaries

40 visites al añu, un tema por mes y tolo recaldao destinao aiciones de responsabilidá social. Son les visites guiaes solidaries qu’entama Xixón Turismu, al traviés d’Infoxixón, dientro’l plan d’aiciones p’algamar el sellu Biosphere Empreses, a lo llargo de 2019 y que tienen una temática estremada cada mes: Xixón Industrial, Cimavilla y Xixón en femenín son les que se van faciendo fasta agora.

Nel mes de Xunu la propuesta ye lliteraria: conocer el cascu hestóricu de Xixón colos güeyos d’un escritor, tornándolu n’escenarios de novela, atravesando les places más típiques de Cimavilla, dende la plaza’l Marqués, pasando pela Plaza Mayor, la Tabacalera o la Plazuela Xovellanos, dando la oportunidá d’escubrir aspeutos del Xixón de la so dómina qu’agabiten a comprender un poco más la hestoria de la ciodá. Tarán presentes los escenarios de rellatos de Pachín de Melás, José Fernández Barcia, Manuel Vega y Joaquín Alonso Bonet, ente otros, nun paséu nel que Xixón va ser la protagonista auténtica.

La cita ye tolos sábados del mes, a les doce’l mediudíe, nel puntu d’Información allugáu nel Puertu Esportivu. El preciu, 5 euros, donaráse nesti casu a Ayuda n’Acción, en concreto al so programa de sofitu a la reciella, adolescencia y families en riesgu de dixebra y probitú.

Redaición InfoAsturies

This work is licensed under a Creative Commons Attribution 4.0 International License.