El Conceyu por Otra Función Pública n’Asturies alvierte de que llendar a 79 los puestos de trabayu sacaos a concursu de méritos sedría incurrir en illegalidá
Ante la anuncia sindical na que s’informa de que pa la convocatoria del concursu de méritos que llegalmente tien de facer l’Alministración ta falándose de 79 puestos de trabayu, el Conceyu por Otra Función Pública n´Asturies quier remembrar qu’esto nun s’axustaría al cumplimientu de la llegalidá vixente.
La prósima convocatoria, la primera de magar la entrada en vigor de la Llei al respeutu, tien la obligación d’incluyir tolos puestos que la so forma de provisión pase de llibre desinación a concursu, y estos, denuncien, son munchos más que 79.
Arriendes d’ello, n’aplicación de los artículos 52 y 53 de la propia Llei de Función Pública ta nidio que la convocatoria tien d’incluyir tolos puestos vacantes, en conxuntu una cifra mui perriba de los 79 mencionaos.
Dende’l Conceyu por Otra Función Pública n’Asturies recalquen tamién que “les dificultades que puedan derivase del cambiu de Gobierno y de cadarmes alministratives tendrán de ser resueltes polos que, demientres más de cuatro años, nun quisieron cumplir coles sos obligaciones llegales, pesi al compromisu espresu qu’asumieren públicamente de convocar el concursu nel segundu trimestre del 2.016.
El Conceyu por Otra Función Pública n’Asturies costituyóse’n Payares del 2008 comu asociación abierta a tolos trabayaores pertenecientes a les estremaes Alministraciones Públiques esistentes n’Asturies. COFPA defínese comu una asociación al serviciu del interés xeneral “y non un grupu corporativu nin una cientral sindical”.
Nuria Prendes
This work is licensed under a Creative Commons Attribution 4.0 International License.
