Del 31 de mayu al 2 de xunu de 2019 la banda Re-Percusión Feminista entama’l I Alcuentru: Conciencia y Espresión Feminista en Xixón, col oxetivu d’averar a la ciudadanía asturiana la llucha y acción política visibilizando les estremaes violencies que s’exercen contra les muyeres
El programa d’actividaes que s’inxerten dientru d’esti I Alcuentru entama con un taller d’empoderamientu espresivu con tambores, de baldre, impartíu por Silvia Palumbo (pa muyeres) el 29 y 30 de Mayu dende les 11:00 a les 14:00 hores nel Antiguu Institutu de Xixón.
Una Mesa de diálogu’l 31 de Mayu a les 19:00 nel Antiguu Institutu de Xixón, aconceyará a Monica Cid (Arxentina), querellante y madre de Micaela Ortega, activista feminista resilente que llucha y trabaya diariamente pa erradicar el grooming, Verónica Bajo (Arxentina), d’Acciones feministes de Bahía Blanca y DesBandadas y Silvia Palumbo (Arxentina), activista llesbiana feminista, cantautora, artista y formadora musical. Tamién va facese una pequeña exposición conmemorativa de los 10 años de vida de Re-Percusión Feminista. Pa presllar la xornada, la banda Desbandadas va presentar el so primer discu entituláu “Desbandadas, una crónica musical feminista”. Desbandandas son una banda feminista qu’utiliza tambores, voces y movimientos escénicos caleyeros. La puesta n’escena de la presentación del discu ye una actuación consistente nuna performance política y artística, onde espleguen la realidá na que viven les muyeres.
El sábadu 1 de Xunu a les 21:30 h na Casa’l Pueblu (C/Llanes) de Xixón, actuará LaTxusma, grupu de fémines residentes en Xixón que faen música cargada d’humor y sátira, y pinchada feminista al cargu de Re-Percusión Feminista. Les xornaes finarán con un Pasacais Feminista el domingu 2 de Xunu a las 12.00h nel Paséu de Begoña, con La Banda Lavanda, compuesta por distintes bandes dende Valencia, Euskadi, Gran Canaria, Arxentina, Xixón… col fin de visibilizar les lluches conxuntes.
Redaición InfoAsturies
This work is licensed under a Creative Commons Attribution 4.0 International License.
