• Portada
  • >
  • Asturies
  • >
  • Entrevista a Pepe Fernández Alonso, hestóricu del soberanismu asturianu

Entrevista a Pepe Fernández Alonso, hestóricu del soberanismu asturianu

  • 25 Maio, 2019

Pepe Fernández Alonso vien de roblar l’alcuerdu con Andecha Astur pol que se compromete, xunto con otros representantes d’organizaciones asturianistes, a trabayar na recostrución nacional y pola soberanía d’Asturies

Entrevistamos a esti hestóricu militante del soberanismu asturianu, presente nesti movimientu dende los sos anicios. Miembru de Conceyu Bable, cofundaor nel 77 xunto con Xose Lluis Carmona, Fernando Cueto, Xesus Cañedo y otros del primer partíu nacionalista asturianu, Conceyu Nacionalista Astur (CNA), pasó pelos procesos de ñacimientu del Ensame Nacionalista Astur (ENA) que más tarde se xuntaría cola Xunta Nacionalista Astur (XNA) pa formar la UNA, Unidá Nacionalista Astur. La diáspora túvolu un tiempu allonxáu del escenariu políticu asturianu, pero’l deseyu de volver al país decidiólu a tornar. A la so vuelta integróse nel PAS, Partíu Asturianista. Anguañu vien de firmar el Pautu pol asturianismu ya’l soberanismu, xunto con Andecha Astur y otros conocíos representantes de la brenga nacionalista cuyu compromisu ta sobradamente demostráu por años de trabayu por Asturies.

Cuéntame dalguna alcordanza d’aquellos anicios…

Yo entro na llucha de vindicación asturiana na primavera del 76, en Conceyu Bable, del que supe a traviés d’Asturies Semanal, tenía entos 17 años. Allí conocí a Xuan Xose, Urbano, Manfer… entré nel PSPA d’Asturies, onde tuve 3 o 4 meses. Nes primeres elleiciones había un sector, más asturianista, que queríemos que s’integraren n’Unidá Rexonalista pero decidieron nun lo facer y al pocu nos formamos el niciu de lo que sedría Conceyu Nacionalista Astur, con Carmona, Xesus Cañedo, Fernando Cueto…; aquel yera un momentu de muncho fervor políticu, de muncho movimientu.

Tuve de colar, pero cuando venía a Asturies seguía diendo a conceyos y asina tuve nos que  se creó l’Ensame Nacionalista Astur, que dempués se xuntaría cola Xunta Nacionalista Astur pa formar la UNA, Unidá Nacionalista Astur, onde entré yo cuando volví, nel 88. Cuando tou esti movimiento esborronó pasé un par d’años daqué allonxáu, más metíu en temes culturales como’l Garrapiellu… finalmente, integréme nel PAS, Partíu Asturianista, nel qu’entré na executiva nacional, como secretariu d’organización, hasta anguañu

¿Diries qu’hebio un momentu na hestoria reciente d’Asturies nel que la Soberanía foi posible?

Hubo un momentu importante, durante la llexisllatura del 95 al 99, gobernando Marqués, cuando el PAS tabemos nel parllamentu -tuvimos 21.000 votos-, que fue posible dar un pasu grande. Tuvimos a piques d’incluyir una reforma del estatutu na que se proponía qu’Asturies fore reconocida comu nacionalidá histórica y se reclamasen les másimes competencies d’autogobiernu permities pola constitución, dándose la opción de, nos siguientes años, se pudiere aprebar la oficialidá y quedare recoyía ensin más torga llegal.

Col PAS, el PP votó a favor, ya’l PSOE sabiemos que votaría en contra porque dende siempres taba dafechamente en contra de cualquier cosa que tuviere que ver cola llingua. Necesitábemos los votos d’Izquierda Unida, pero votaron en contra y perdióse una oportunidá perimportante.

Lluéu, al nun poder sacar esto, foi cuando ficimos la Llei d’Usu y Promoción del Asturianu, colo que, aunque nun yera’l nuesu oxetivu, polo menos permitió unos minimos drechos al asturfalante que son los que tenemos entá güei. Nesa llexisllatura féxose muncho pola cultura asturiana.

Vieno dempués la resquiebra, cuando Cascos y la SOMA pautaron los fondos mineros mientres Marqués los quería xestionaos por Asturies y Marqués creó’l so partíu, llevando parte de los nuesos votos, al mesmu tiempu que la campaña en contra nos d’IU, acusándonos de que por culpa nuesa nun había más autogobiernu nin oficialidá -cuando fueron ellos los que lo torgaren, pero nos nun teniemos el so aparatu de propaganda-  y por unos cientos de votos quedemos fuera del parllamentu.

Pasó lo que mos pasa una y otra vegada, que por ser creyentes de partios españoles damos la espalda a los nuesos y creemos que nos van traer la solución cuando toles vegaes lo que pasa ye al revés.

¿Qué esperes d’esti pautu?

Espero disciplina y organización. Una vez que les persones se compromenten llibremente, tienen que responder, nun salir caun por ca lláu, que nos apoyemos.

 

¿Cómu ves la situación actual del soberanismu?

L’asturianismu necesita crecer pente lo que ye’l nuesu ámbitu. La cultura asturiana, la llingua, la sidra mesmo, la música… tou ello ta ehí pol puxu que-y dimos los nacionalistes pero nun conseguimos tresmitiyoslo a la xente d’estos ámbitos. Muncho del movimientu cultural que esistió, bandes de gaites, tonada, festivales celtes, recuperación d’horros, del traxe… fuimos nos los que participemos sofitando estos proyeutos.

Ye dolioso ver comu xente a la que dimos puxu, depéss cuando se-yos pidin collaboraciones, por exemplo usar una música o un sofitu paez que naida s’alcuerda, al tiempu que tan tocando o canciando ensin problema pa partios españolistes que nun tienen nin una pallabra n’asturianu nel so programa.Tamos faciendo una recostrución nacional, faciendo país y tovía nos miren mal.

¿Qué tas dispuestu a aportar?

Llevo nesto más de cuarenta años, puedo apurrir la experiencia ya’l conocimientu, ayudar a distinguir lo válido y lo que nun lo ye, nun quiero sonar prepotente pero teo intuición y se más por vieyu que por diañu.

A la xente que vaiga incorporándose digo-yos que nun descubren na nuevo, que nun empiecen ellos el mundo, qu’hai muncho detrás, muncha historia, y que si ellos tan equí ye por tolo que se fizo anantes.

 

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies