Esti ye namás un de los problemes que carez la Ría de Villaviciosa y que requieren la urxente intervención de les alministraciones pa salvar esti espaciu natural protexíu

Nel añu 2013 díeronse por finalizaos los trabayos destinaos a la restauración ecolóxica, de los terrenos sobro’l túnel de l’A-8 en Villaviciosa cola costrucción d’un humedal nel Cierrón na Ría de Villaviciosa, pero dende la mesma fecha de la so costrución van poniéndose de manifiestu dellos problemes que nun tan siendo afrontaos y que tienen comu consecuencia que les charques tean ensuches. Esto ye especialmente grave pa les aves qu’añeren na fastera y que tan nesti intre en plenu procesu de reprodución: la falta d’agua déxales ensin recursos tróficos ya albentestate, espuestos a la depredación de los sos ñeros y pitos.

El problema, indiquen, podría solucionase aprofitando les marees vives p’abrir les compuertes y permitir el pasu d’agua, asina comu captando agua dende dalgún regatu cercanu.

La continua invasión del cercáu de “Les Caleyes” por animales domésticos supón tamién un deterioru l’humedal ya un pelligru pa la fauna silvestre, polo que demanden que se regule ya informe pa que l’espaciu nun seya invadíu por persones nin animales, llendando les actividaes que puedan suponer un estorbu pa la fauna silvestre y aumentando l’espaciu restrinxíu.

Remembren que la Ria de Villaviciosa ye Reserva Natural, Llugar d’Interés Comunitariu (LIC), Zona Proteición de les Aves (Zepa) y que ta dientro la Llista d’Humedales d’Importancia Internacional polos sos destacaos valores ambientales RAMSAR (Convención Internacional relativa a los Humedales de Importancia Internacional) y reclamen que se convoque’l Foru de la Ría, nel que tienen de tratase estos y otros problemes de conservación d’esti espaciu natural y que lleva años ensin convocase.

Redaición InfoAsturies

This work is licensed under a Creative Commons Attribution 4.0 International License.