Carta a les candidatures, d’una ma con necesidaes especiales

  • 8 Maio, 2019

Tamos  n’elleiciones, dómina na que tou tien arreglu. Escaézanse de xalés, de bancos, de visites, de PGOs, de turistes y de pallabres vacíes, que se lleva’l vientu. Centren, por favor, nes demandes urxentes d’una parte bien importante de la población. D’estos guah.es que namás nos tienen a nós y, costantemente, pidin ayuda

Recoyemos el testimoniu d’una ma que, a traviés d’InfoAsturies, quier dirixise a toles candidatures de la presidencia d’Asturies. Por respetu y seguridá, nun daremos nomes, ya que ta implicáu un menor y caltener la so intimidá ye prioritario

Tengo un fíu de 7 años. Ye allegre, llistu, rápido como la lluz, intelixente, resueltu y ,claro, guapísimu.
Cursa los sos estudios de Primaria nun centru públicu de Xixón. Como alumnu con Necesidaes Educatives Especiales (d’equí p’arriba, NEE), tien cubierta la so condición como tal hasta lo imposible, teniendo en cuenta los escasos recursos de los que se disponen. Ello ye: Mayestra d’Audición y Llinguaxe (AL), Pedagoga Terapeútica (PT), orientadora, y ausiliar educativa. Tamién dispón d’una llogopeda privada, yá que na Unidá d’Atención Infantil Temprana (UAIT) convidáronnos a ello nel so momentu pola escasez de profesionales no público, pa la gran
demanda qu’hai.
Ente otres coses entá por definir, dada la so edá, (llamémoslu) C. vive con Trestornu Específicu del Llinguaxe (TEL) espresivu, Trestornu Grave de Conducta (TGC) y otros entá por identificar, amás de ser posesor de gran capacidá intelectual que precisa cubrir de continuu en forma de conococimientos. Poro y, dáu’l so “retrasu madurativu”, cuésta-y xestionar les emociones y los impulsos, dando llugar a unos biltos bien agresivos física, sicolóxica y emocionalmente, qu’utiliza como defensa, ensin poder regulalos, magar que llucha por controlalos. Y sufre, asgaya.

Lleva recibiendo atención en Salú Mental Infantil (SMI) de Puerta La Villa en Xixón dende los 3 años. Va tamién a un centru especial – alministráu por Cáritas Social, al traviés de los Servicios Sociales – onde apriende a rellacionase con otros y a remanar situaciones, dende va dos años. Como ma, allegué a distintos talleres para reeducarme nel tratu con estes vicisitúes,  a reconoceme como ma y a nun culpame por vivir nun marcu distintu al qu’esperabes. Sí, porque quies al to fíu hasta onde nun se sabe, pero, cuando ta en dómines de grandes crisis y estroza la casa, les tos coses, les suyes, afréllate y ponse en peligru a él mesmu, duldes hasta de la to vida y pienses en tirar la toballa.

Nun lo faes porque ye la to sangre. Ca pelu de so, ye tú. Ca mirada, ca pallabra, ca esbocexu, cada sorrisa. Tou eso, amás de date enerxía, salió de tí, de la to barriga y de los tos dolores. Sigues alantre, por él, por ti y por salú. Porque sería traicionalu de nun ser asina.

Recibo tamién terapia sicolóxica, cola que convierto los problemes en soluciones, faciendo los díes más cenciellos. Al pie de esto, evidentemente, nel mio organismu instálase acaldía la so dosis de ansiolíticos. Ye asina. La química ta ende pa daqué.
Con esti pequenu resume de lo que puedo cuntar, pa ponevos en situación, vengo dici-yos:
Agora mesmu, C. empezó apocayá a melicase,esperando que lu ayude a llevar una vida meyor, al par d’otres terapies. Nun ye l’únicu menor nesto. Hai munchos y con distintos trestornos y niveles. ¿Cuálos son los problemes más urxentes a solucionar? Siéntense, que la llista ye llarga:

Empecemos pola SANIDÁ. Nesta, nuesa amada SANIDÁ PÚBLICA, hai grandes
profesionales en tolos ámbetos. Siempres va haber un garbanzu negru, ¡claro! Pero nun seríamos humanes si esto nun asocediera. N’Asturies, por casu, hai unos 10 llogopedes partíos ente’l Huca (6), l’Hospital Monte Naranco (3) y l’Hospital de Cabueñes (1). Nes ocho UAIT (Unidá d’Atención Infantil Temprana), namás dos pertenecen a la caña pública. Nunca hubo ufierta pública d’emplegu pa estes profesiones tan necesaries. Nel casu de la Foniatría, inclusive, peor. Somos pocu más d’un millón d’habitantes n’Asturies. Esto significa que nun tán cubiertes nin toles patoloxíes nin  toles persones.

Ca vegada hai más casos con problemes llogopédicofoniátricos (disfasies, afasies, dislesies, etc), por nun falar de pacientes infartaos cellebrales o con cáncanu o otres enfermedaes. Non tol mundu puede dexase el pagu d’una atención privada que, per otru llau, nun tendría de ser asina, cuidao que yá se ta pagando por un serviciu oficial.
Ensin desmerecer quien se dediquen a la práutica privada.
Tocantes a les ocupaciones de la Sicoloxía, la situación nun difier muncho. N’Infantil –tamién n’adultos, pero cinxo al casu del mio fíu – , nun dan abastu y les consultes son curties na so duración, llargues nes sos convocatories y non porque’l menor nun tenga falta d’ello, sinón pola falta manes, lo que fai que nun puedan tratase les sos alteraciones como debieren. Eso sí, siempres cola atención impecable per parte de les persones que formen la prestación. Per otru llau, lleva tiempu falándose de los hospitales de díe, pa menores con distintos trestornos sicoemocionales, ente otros. La cabera noticia – lleida na prensa asturiana va poques selmanes – ye que va abrir el primeru n’Uviéu. Más allá de la tardanza, lo que más llama l’atención ye que’n función de la demanda, fadríen más falta’n Xixón. Déxenme dici-yos, ensin acritud dalguna, que nun viven na realidá de la ciudadanía. De la mesma manera qu’esisten centros de díe pa persones mayores, pa enfermos de alzheimer, etc, TIENEN d’abrir pa estes persones. Faen más falta qu’agua en seca. Y, abusando, non yá nestes dos ciudaes, sinón cubriendo más sitios, porque esisten en tolos pueblos y ciudaes asturianos xente con necesidaes y non tola población tien facilidá o medios p’allegar a los centros médicos.

Urxe contratar a más personal : D’enfermería, de Siquiatría, de Sicoloxía, … Especialistes en Salú Mental. Porque hai, esisten, tán ende. Formaes, esaminaes y llistes pa trabayar equí, n’Asturies. Urxe convocar más
places, porque la ufierta queda curtia.

Tóca-y la vez a la EDUCACIÓN.
La Educación Pública que tanto costó, que tanto arguyu produz. Pública, de toes y pa toes. Una ayalga qu’hai que caltener seya como quier, como la Sanidá. Son los dos pegoyos fundamentales d’una sociedá progresista y xusta.
Al marxe de los distintos sistemes educativos (logse, lomce, traballingües varios), podría furrular meyor. Nun hai discutiniu y nun ye por cuestiones que tengan que ver colos sos trabayadores. Son dellos motivos, pero sigo centrando no que nos ocupa. La INCLUSIÓN NUN ESISTE. Ye un un conceutu bien guapu y, nel papel, queda de maravía. Sicasí, esisten un gran vacíu al respeutu.
Por muncha formación pal resolvimientu de conflictos y similares, por casu, que reciba esi magníficu y sufiertu profesoráu que tenemos, nun ye abondo. ¡Claro que forma parte del so trabayu! Pero sigue ensin ser
abondo. Lo más importante de les mayestres y mayestros ye danos xuna educación académica, n’igualdá y
respetu. Pero son humanes y , como tales, esgótense. La carga que tienen namás se conoz viviendo’l díe ente díe de los colexos públicos (los que conozo; ignoro cómo furrula un alcordáu). Tenemos de curiar a estos individuos, primordiales na sociedá, y non estresales nin devasales con estres pa los que nin la cabeza nin les manos dan.
Una vegada más, recuérdoyos qu’acaldía hai más neñes y neños con NEE. Les ayudes que reciben
quédense curties. En dellos casos, como foi’l de C., fasta hai que camudar de centru escolar. El mio fíu, que lo vivió con 3 años, entá lo remembra y lo remembrará, siéntelo como un tarrecible momentu de refuga contra él mesmu. Bien h.odio que tan pequenos yá tengan estos traumes. ¿Porqué pasó esto? Bien cenciello: Inesplicablemente, NUN HAI AUSILIARES EDUCADORES EN CA COLEXU, polo que , centros que tienen la suerte de cuntar con
esti recursu, tán rebasaos. En dalgunos, fadríen falta fasta dos ausiliares, curiao qu’atopamos tamién con problemes de movilidá. Inda asina, teniendo en cuenta que ca escolín ye estremáu a otru y tán en cursos distintos, el sofitu sedría bien xustu. Dientro d’esto, ta la tema de la contratación: Polo xeneral, por cursu, vienen trés especialistes, una por trimestre.
L’ausiliar educadora ye la persona de referencia d’estos pequeños. Si, al volver de vacaciones, ve que camudó, imaxinen cómo llega a sentise. El llabor que faen nun ye namás d’acompañamientu, sinón que primero tienen que conocelos y ganase el so enfotu, que nun ye fácil, y faer que la/la neña/o se sienta segura/o. Por suerte, dalgún colexu yá consiguió que la mesma persona tuviera mientres tol cursu. Tou esto ye estensible al restu de recursos.
Tou esti escesu de responsabilidaes tórnase no siguiente:
• Atención escaso pa tol alumnáu con NEE.
• Movilización de tol personal escolar pa cubrir toles desixencies d’ésti, usando, inclusive, los sos ratos llibres.
• Imposibilita la “integración inclusiva” yá que, según la so patoloxía, gravedá y cursu nel que tea, non siempres ye posible que tea acompañáu d’un ausiliar educador, anque sí por una profesora o profesor, en desterciu del alumnáu ordinario.
• Non siempres hai abondu profesoráu de sofitu.
Non toles afectaes con Necesidaes Especiales pueden allegar de normal a una actividá estraescolar, yá que namás  suel haber una persona al cargu de 15 neñes/os. Hai que contemplar la posibilidá de contratar (¿otra vegada?) a más xente, pa que tengas les mesmes oportunidaes que les demás. Con estes faltes, a la fin, o los echen por cuenta de la so condición (por non poder atende-yos, básicamente, y provocar el desorde de l’actividá) o nun s’apunten por mieu al refugu.
C. recibe la beca por NEE cola que puedo pagar al so llogopeda. Pero nun ye abondo. Ca vegada hai más inconvenientes y deniéguense más ayudes. O retrásense más, magar, anque la solicitú cursa na conseyería, el que paga ye’l ministeriu. Fai falta usar les perres, gastar, porque pa eso ye lo público, supuestamente, nun debe d’esperar ganancies d’esti tipu, sinón enllenar los furacos de la población en forma de beneficios.
Podría tene-yos equí mientres hores, pero creo haber espuestu lo más importante, por que seyan coscientes.
Naide escueye esto. Naide deseya nengún mal a naide. Ye daqué que te toca”. Pásase mal, porque tampoco ye del tou entendio si nun se vive y pola falta de visibilidá – nun fai falta tener dalgún tipu de tara físico pa que la to mente furrule d’otra manera. Les discapacidáes son múltiples-. Tamién por mieu, pos nun quies qu’el to fíu sía señaláu anque, finalmente, lo seya.
Somos la sociedá de la etiqueta. Enfrentes al mundu, porque ye a lo que te lleva la rabia.
Apriendes a ignorar miraes y comentarios cuando’l to fíu crucia la cai, nun centru comercial, nuna cafetería,nel autobús… Conviertes el to corazón en piedra pa poder siguir alantre. Namás y lu enseñes a él, al que salió de ti, con tola to ilusión y ganes de da-y tol amor, yá que ye quien realmente lo precisa. A última hora, namás tais él y tu.
Como fervosa defensora de lo PÚBLICO, d’esta democracia que tanto entardó n’aportar (con munches pegues, pero democracia no básico), votante, ciudadana del mundu y de esti gran llugar que ye ASTURIES, pído-yos, encarecidamente, qu’escaezan el so collor. Magar tar n’elecciones, dómina na que tou tien arreglu. Escaézanse de xalés, de bancos, de visites, de PGOs, de turistes y de pallabres vacíes, que se lleva’l vientu. Centren, por favor, nes demandes urxentes d’una parte bien importante de la población. D’estos guah.es que namás nos tienen a nós y, costantemente, piden ayuda.

De nada sirven les escueles 0 – 3, por casu, si, cuando hai una incidencia d’estes carauterístiques, nun puede solucionase o queda curtia. Nun tenemos que ser les mas quien tengamos que dir a ca puerta nin llamar a tolos númberos y danos de focicu por nun llegar a nengún llau, porque TIEN DE haber una rede multidisciplinar de profesionales cubierta al 100%, que tea al tantu d’estos asuntos y sepa lo que fai falta, ensin esplotar a la xente que se dedica a ello, que son quien paguen les nueses frustraciones finalmente. Los neños y neñes con estes peculiaridaes tamién merecen crecer felices, nun sufrir, tener esperanza nel futuru y SER RESPETAES pola alministración.
Ustedes que, voluntariamente se presenten a puestos de responsabilidá pa faer de les nueses ciudaes y pueblos sitios meyores, gánense los votos. Déxense d’acusaciones, crítiques non costructives y de prometer ensin seguridá. Non tolos partíos políticos son iguales, yá que ye cayer n’una vacua demagoxa que nun sirve de nada y na que nun creo. Opine lo que yo opine, hai temes que nun son de la derecha nin de la esquierda nin del centru, son de la coherencia. Recuerden que güei, el mio fíu tien 7 años, pero mañana va tener 18 y va exercer el so drechu a votu (o non, siempres con bonos argumentos, d’eso toi cierta). Ustedes pudieron escoyer pidir enfotu. El mio
fíu y yo nun escoyemos esto.
Gracies pola so atención, UNA MA DE TANTES.

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies