La obsesión centraliega ya’l desaniciu de l’Asturies rural atrae a la población a una ciudá que nun ta en condiciones d’asumir l’impautu mediuambiental del so xorrecimientu
El conceyu nun tien una rede afayaiza de tratamientu d’agues residuales, la calidá del aires, ya mui deficiente por mor de la falta de control de les emisiones de les industries vese agravada pol espoxigue del tráficu, nun hai un correchu control de la flora y fauna invasores nin s’alcontró solución a les periódiques manches de carbón na sablera San Llorienzu, pente otres cuestiones…
La terminal granelera d’El Musel ya’l parque de carbones, onde s’almacena’l carbón que nun se puede producir n’Asturies por contaminante pero que se merca a otros continentes, la cementera de Tudela Veguín, la térmica d’Aboño y l’acería de ArcelorMittal son les principales fontes de partícules contaminantes, ya que pesi a les informaciones de les empreses sobro la puesta en marcha de midies pa rebaxar les emisiones, les mesmes son nidiamente visibles dende la ciodá en forma de grandes ñubes. Los estudios indiquen que’l 58% de les micropartícules tienen orixen industrial y correspondiendo la mayoría, un 82%, a la planta siderúrxica, un 14% a la térmica ya’l 4% a la cementera. A ello hai que sumar un 42% de contaminación por vehículos, nos que pesa muncho l’actividá de tráficu pesáu con destín a El Musel.
Tampoco ta Xixón preparao pa inundaciones y tormentes, qu’amás prevoquen nuevos arramaos de coleutores, insuficientes y non nes meyores condiciones, lo mesmo que los pozos de tormentes, dos d’ellos entá n’obres.
Estes y otres deficiencies ponen n’estáu d’alerta a delles organizaciones ciudadanes esmolecies pola urxencia d’adautar Xixón a les necesidaes del so creciente númberu d’habitantes, anantes de qu’empeoren más entá les condiciones de salubridá de la ciodá.
Llucía F. Marqués
This work is licensed under a Creative Commons Attribution 4.0 International License.
