Conocer la hestoria industrial de Xixón y, al mesmu tiempu, collaborar col Centru d’ Iniciatives, Solidaridá y Emplegu (CISE). Ye la propuesta pa los díes 5, 18 y 26 de mayu que forma parte del ciclu de visites guiaes solidaries que Xixón Turismu entama en 2019
La visita escomencipia en Fomento, llugar que sirvió como puertu pesqueru, carboneru ya industrial. El percorríu sigue per Cimavilla y l’antigua Fábrica de Tabacos. Darréu, visítase la Casa Natal de Xovellanos, la plaza Mayor, Campu Valdés y la Escalerona, zona d’espardimientu y de balnearios a finales del XIX. La visita termina na Ciudadela Celestino Solar, ún de los pocos exemplos de vivienda obrera que se caltuvo hasta los nuesos díes y que sirve pa conocer les condiciones de vida de les families obreres de finales del XIX y principios del XX.
La visita va realizase los díes 5, 18 y 26 de mayu a les 12:00h y y va costar 5€. Puntu alcuentru Infoxixón (Fomento). Duración aprox 2 hores. Ye preciso inscribise n’Infoxixón. Tel. 985 341 771 / Corréu lletrónicu: infogijon@gijon.info
40 visites al añu, un tema por mes. Son les visites guiaes solidaries que va entamar Xixón Turismu, al traviés d’Infoxixón, a lo llargo de 2019 y que van tener una temática estremada cada mes. Tolo recaudao nes visites va dase a delles aiciones de responsabilidá social. El ciclu enmárcase nel plan d’aiciones p’algamar el sellu Biosphere Empreses pa Infoxixón.
Sobre CISE
CISE ye una entidá ensín ánimu d’arriquecimientu que trabaya, dende 1987, pola incorporación sociollaboral, al traviés d’información, formación y acompañamientu na búsqueda d’emplegu.
Redaición InfoAsturies
This work is licensed under a Creative Commons Attribution 4.0 International License.
