El Coleutivu Ecoloxista d’Avilés denunció nel díi de güei énte’l Gobiernu d’Asturies y énte la Confederación Hidrográfica del Cantábricu un nuevu arramáu d’agües residuales nel riu Arlos viniente del coleutor de Les Vegues en Corvera d’Asturies, coincidiendo col bastiazu d’esta tardi

Los vecinos denuncien que’l coleutor de Les Vegues rebasa sistemáticamente ca vegada que les lluvies son un pocu fuertes, virtiendo agües residuales direutamente al ríu, de manera apreciable visual y olfativamente.

Les continues multes a les que s’enfrenta’l Conceyu de Corvera nun paecen ser abondo pa obligar a camudar el coleutor y la so interconesión, que lleven dando problemes cuasi dende la so istalación, problema que se xune a la necesidá de meyores na depuradora de Macua, nidiamente incapaz de tratar toles agües de la contorna.

Estos arramaos afeuen non solo al ríu en si mesmu, sinón que vienen sumase a los munchos episodios contaminantes de los distintos afluentes que desagüen na ría d’Avilés.

Nuria Prendes

This work is licensed under a Creative Commons Attribution 4.0 International License.