El conceyu Bimenes reclama que l’EMA se faiga cargu de les consecuencies derivaes d’una avería nes sos istalaciones que lleva tres meses forciando al ayuntamientu a repartir l’agua en cubes

Los argayos producios poles fuertes lluvies del pasáu 23 de Xineru prevocaron la rotura de la tubería de la EMA que lleva l’agua dende’l conceyu de Casu a Xixón, dexando ensin soministru el depósitu de Fontoria, en Bimenes, qu’abastez una decena de nucleos, apurriendo agua a más de 300 persones.

Darréu l’acidente, y cuntando con una rápida reparación de la infracadarma de la empresa d’agües, l’Ayuntamientu de Bimenes punxo en marcha un serviciu de tresporte d’agua con cubes qu’asegurare la disponibilidá d’agua en tol conceyu. Los trabayos de repartu desendólquense con personal municipal y con empreses esternes  pa ampliar l’horariu, que s’allarga más de 15 hores diaries.

El conceyu Bimenes faese cargu de los costes, un gastu non presupuestáu, perdiendo amás la disponibilidá de los trabayaores dedicaos a eses llabores, polo que l’equipu gobiernu vien de remitir un comunicáu a la empresa d’agües de Xixón, EMA, solicitando collaboración p’afrontar los gastos que la so avería ta ocasionando na xestión del conceyu.

Los vecinos destaquen la efeutividá cola que se tan desendolcando les llabores de repartu, que consiguieron que’n tres meses nun se produxera dalu desabastecimientu.

Redaición InfoAsturies

This work is licensed under a Creative Commons Attribution 4.0 International License.