SUATEA denuncia’l “maltratu salarial” que carecen los docentes asturianos, al ser les sos retribuciones bultablemente inferiores a les del estáu español
El salariu del profesoráu, como’l de tol funcionariáu, compónse d’una parte básica (retribuciones básiques) y otra complementaria (retribuciones complementaries). Paradóxicamente, les complementaries -que nel casu de los docentes dependen de les autonomíes- suponen más del 50% del so salariu a lo llargo de tola vida llaboral.
Mientres que n’otros territorios s’incrementó’l Complementu Específicu del salariu, col envís de compensar los recortes salariales impuestos pol PP, qu’implicaron una perda del 17% de capacidá alquisitiva, n’Asturies esti complementu autonómicu ye’l más baxu de tol Estáu: 518 € frente, por exemplu, a los 742€ de Cantabria
Ello trai como consecuencia que los sueldos del profesoráu con menos de cinco años d’antigüedá seyan los más baxos del Estáu na enseñanza Secundaria y los terceros más baxos nel cuerpu de Maestros (ver tabla comparativa) pudiendo llegar a perpasar el 15% la diferencia retributiva. Creáu esti erial salarial yá dende’l 2010, la Conseyería Educación, cola collaboración de los sos sindicatos amigos, ufiertaron como “tabla salvación” al afuegu salarial, el xantaxe d’un incentivu salarial a cambiu de sometese a una bufa evaluación del desempeñu docente que nengún de los otros territorios carez, anque tengan pagues equivalentes o incluso mayores. Amás d’esti agraviu comparativu con otros territorios, esti incentivu discrimina tamién a les persones que se punxeron males (esti cursu 176 persones fuerondeclaraes non evaluables) y a aquelles con menos de 5 años de serviciu prestaos n’Asturies, que nun tienen acesu a esti incentivu.
A ello súmase un abusu más: dellos sindicatos -llamaos “collaboracionistes” por SUATEA- pautaron cola Alministración asturiana qu’un 0.6% de la masa salarial de los emplegaos públicos asturianos se destinare a un “Plan de Pensiones d’Emplegu” soscritu conuna aseguradora privada (CASER). Derivóse asina parte del salariu de cada
trabayador/a a la especulación bancaria. L’aportación alministrativa a esti plan yá foi suspendida colos recortes y munchos emplegaos siguieron aportando perres al plan viendo como esti últimu añu sufrieron pérdides d’un 4,31%.
Por tou ello SUATEA desixe la xuba llinial nel Complementu Específicu, de competencia asturiana, qu’igüe la perda de la masa salarial d’estos últimos años ensin sometela a denguna condición nin plan d’evaluación docente.
Tamién pidin una xuba salarial estatal del 17% que permita recuperar la capacidá alquisitiva perdío, depués de la que tendría d’amestase una meyora añal igual o superior a la del IPC.
Redaición InfoAsturies
This work is licensed under a Creative Commons Attribution 4.0 International License.
