Esa ye la conclusión que debería sacase de la Encuesta de Fecundidá del INE recién espublizada y non que les asturianes nun queramos tener fíos

Recueye la encuesta que’l 21,4% de les asturianes menores de 40 años nun se planteguen tener fíos y que’l nuesu país tien la menor tasa de naciatos por muyer.

Asturies necesita, pa equilibrar el saldu vexetativu de la población, unos 6.000 rapacinos más ca añu, pero la tasa de fecundidá (1’15) ye la más baxa l’estáu. Amás, son les que tienen más de 35 años -cola mayoría de fíos polo menos n’edá escolar- les que suben esta tasa, ya que pente 30 y 34 años la tasa cae al 0’49 y namás 0’13 fíos por muyer menor de 30 años, lo que sumao a la baxa motivación pola maternidá futura recoyía na encuesta fae albidrar un emportante amenorgamientu nos prósimos años.

Tener fíos ye una decisión mui personal y ta nidio qu’habrá asturianes que nun quieran por otros motivos, pero nun puede negase que formar una familia n’Asturies na situación socioeconómica d’anguañu ye un actu de fe y una actividá d’altu riesgu.

This work is licensed under a Creative Commons Attribution 4.0 International License.