El coleutivu La Rede Xixón Oeste torna a convocar a la población xixonesa a un manifestamientu que, como nel cellebráu en febreru, destaca pola amplitú de los temes revindicaos: emplegu, salú, vivienda y lluz barato. En resume, por una vida digna, futuro pa los barrios ya’l respetu de los drechos sociales básicos
Los manifestantes tornarán a percorrer mañana les cais del Oeste xixonés, entamando na Ilesia de Fátima a les siete la tardi y finando nes emblemátiques ruines de lo que foron los astilleros de Naval Xixón, tou un símbolu de la resistencia obrera xixonesa.
Les demandes son, amás de munches, asemeyaes a les de l‘anterior convocatoria “Un futuru p’Asturies”, qu’aconceyó a miles de presones, ya que de magar entós nun hebio cambios sostanciales na situación. Protesten poles actuales condiciones de vida nos sos barrios, en particular, y nel país, en xeneral, recalcando que la falta d’acesu a emplegos dignos que permitan facer frente a los descomanaos costes de la vida (lluz, gas, vivienda…) ta obligando a un esiliu forciau a bona parte de la mocedá asturiana, afeutando mui especialmente a les fasteres obreres, comu ye’l casu de los barrios del Cerilleru, Fátima, La Calzada ya’l Natahoyo.
La so apuesta ye por una industria soberana, llimpia, que permita crear emplegu dignu y al tiempu compaxinar alta produción con bona calidá de vida pa los vecinos, ello ye, compaxinar los intereses de la empresa y de los ciudadanos de manera que se garantice un futuru n’Asturies pa les xeneraciones vinientes.
Nun quieren escaecer tampoco otra de les cuestiones qu’amenorguen la calidá de vida nestos barrios: l’alarmante contaminación que se respira nellos y les sos consecuencies sobre la salú, alertando de que de llevase a cabu’l proyeutu de costrución d’un macroalmacén de carbón n’El Musel agravaría esta cuestión. No que cinca a esta obra consideren que ye “Una hipocresía costruyir un almacén pa distribuyir carbón a toa Europa n’El Musel cuando la Xunión Europea ya’l nuesu país apuesten supuestamente pola fin de la quema d’esti combustible”.
Llucía F. Marqués
This work is licensed under a Creative Commons Attribution 4.0 International License.
