• Portada
  • >
  • Mundiu
  • >
  • Diana Riba, candidata númberu 2 a Europa por Agora Repúbliques “nun queremos depender d`un estáu español que nun mos dexa avanzar democraticamente”

Diana Riba, candidata númberu 2 a Europa por Agora Repúbliques “nun queremos depender d`un estáu español que nun mos dexa avanzar democraticamente”

  • 5 Abril, 2019

Entrevistamos a Diana Riba, que se presenta como númberu dos a les elleiciones europees na llista de la coallición Agora Repúbliques. Nun refuga venir a Asturies a presentar el llibru “Esperança y llibertat”, escritu pol so home, Raul Romeva, dende la cárcele

 

De man, queremos conocer la so visión d’esti proyeutu, Agora Repúbliques

Ara Repúbliques ye la coallición que fiximos con EH Bildu, Ahora Canarias, Puyalón, BNG, y por supuestu colos asturianos, Andecha Ástur.

La idega ye que, como nes elleiciones del parlamentu européu del 26 de mayo España ye circuscripción única, tolos votantes del estáu español pueden xunir les sos fuercies pa votar a esta coallición, seyan o nun seyan d’estos pueblos y con esto queremos dar la oportunidá a cualquier republicanu ciudadanu del estáu español, pa votar una llista que va lluchar nel parlamentu européu poles llibertaes de los pueblos, les sos llingües y les sos necesidaes como pueblos dientro de los estaos.

Nesti sen tamién hai un manifiestu al que pueden apuntase más asociaciones y entidaes del estáu español.

 

Pero los europarlamentarios pertenecereis a unes naciones concretes… ¿cómo pensais asegurar que tolos pueblos ten representaos’ nel parlamentu européu?

Agora repúbliques va tener distintos eurodiputaos dientrol parlamentu, qu’anque nun seyan d’estos pueblos va asignáse-yos la representación de los sos intereses, de manera que puedan defendelos y trabayar nel europarlamentu, trabayando pa ellos y poles necesidaes de cada territoriu, nes temes económiques, medioambientales, sociales… en tolo que pueda trabayase dende ellí.

 

Hai quien diz que virtualmente yes el númberu un na llista…

La llista encabezala Oriol Junqueras y él tien tolos sos drechos políticos intactos, yá que ta en prisión preventiva, nun tien sentencia y esperemos que nun haiga, y ta amás en territoriu español. Tamos seguros de qu’él pue ser eurodiputáu nel parlamentu, o como minimo puede coyer l’acta. Hasta agora España respetó esti drechu, nel parlamentu de cataluña pudieron coyer l’acta, nun vemos porque nun lo fadría nesti casu. En casu de que nun lo acepten por cualesquier motivu, que de xuro sedría xudicialmente erroneu, vamos pidir al parlamentu européu que s’asitie al respeutu.

Acudir al parlamentu yá ye otra tema, porque se tendría que suspender la prisión preventiva, cosa que ye posible siendo un cargu elleutu, pero que tenemos el precedente de que va añu y mediu tán en prisión los diputaos elleutos del parlamentu de Cataluña.

 

A tí tocóte vivir la prisión dende mui cerca…

Si, el mio home ta en prision, ye Raul Romeva; vivimos la prisión diariamente porque tenemos al mio home na carcel, el padre de los mios fíos.

Raul escribió un llibru sobro la tema “Esperança y llibertat”. Ye un llibru escritu dende la cárcele, que fala del procesu catalán dende los sos entamos, dende la nacencia de Junts pel sí dica’l presente y con propuestes de futuru. Ye un llibru bien posáu, tranquilu, que puede lleer cualquier presona y que combina dos voces, la d’un presu que cunta como se vive nuna istitución penitenciaria, y la d’un políticu faciendo analís políticu.

 

¿Vendrás presentar el llibru a Asturies?

El  llibru ta disponible’n tol Estáu, precisamente acabamos de facer la edición n’español, presentémosla en Bilbao y Madrid, y esperemos seya posible tamién n’Asturies. Ye importante que se vea fuera de Cataluña, porque esti llibru espeya nidiamente como se vivió en Cataluña esta situación y como se vive agora, con tranquilidá, serenidá, sabiendo que tamos nun procesu llargu y esta ye una visión que nos medios de comunicación estatales nun lo recueyen. Nel intre políticamente tan convulsu que tamos viviendo, coles elleiciones per delantre, a dalgunos interésa-yos falar de que Cataluña ta dixebrada, de polarización, d’estremos.

Un datu bien importante qu’ilustra como tamos viviendo en Cataluña esti procesu ye qu’el 80% de la población catalana nun quier que los presos ten na cárcele y quier una solucion política. Si miramos como se configuren los votantes en Cataluña, esto reflexa qu’ inclúi mesmo a votantes de, por casu, Ciudadanos, que tán a favor d’una solución política. Esti fracionamientu nun ta nel díi ente díi de Cataluña.

En Cataluña vivimos momentos bien duros, pero somos una sociedá pacífica y democrática con una orientación bien clara a crear una sociedá democrática avanzada. Por esi motivu’l Sí avanza en Cataluña, cada vez hai más “Síes” non porque seyan toos independentistes, sinón porque hai una mayoría de catalanes que nun quieren depender d’un estáu español, que nun mos dexa avanzar democraticamente.

Eso oldea con esta acusación tan grave de “rebelión contra’l reinu d’España” porque la rebelión sofítase na violencia y acaldía que pasa vemos más nidio que s’utilizó pa llevalos a la carcele ya incidir con ello na vida política catalana.

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies