Agora Repúbliques preséntase n’Asturies de la man d’Andecha Astur

  • 25 Marzu, 2019

Asegurar la representación rial de los intereses del Pueblu Asturianu, tantu a nivel estatal comu européu, y condicionar de manera efeutiva la política del estáu español, avanzando nel procesu d’esaniciu de la monarquía española. Esos son los principales beneficios p’Asturies de la participación na coallición Agora Repúbliques, na que comparten enfotu con partios soberanistes d’izquierdes de tol estáu

 

L’actu de presentación d’Agora Repúbliques, que tuvo llugar na Antigua Escuela de Comerciu de Xixón, entamó con una actuación musical del grupu Fontoria Folk, a la que siguió les intervenciones de los representantes d’Asturies, Catalunya ya Euskadi.

 

El primeru en garrar la pallabra foi el candidatu a Europarllamentariu Josu Juaristi d’EHBildu, que fue parlamentariu n’Europa por Los Pueblos Deciden (coallición precursora d’Agora Repúbliques)y que destacó que con esti nuevu ente la representación sedrá de xuro mayor, comprometiéndose a representar cola so llabor los porgüeyos de toles naciones componentes de la coallición. Juaristi recalcó la emportancia d’esta representación de les fuercies soberanistes d’izquierdes nel parllamentu européu, comu contrapuntu al más que probable espoxigue de la estrema drecha nes prósimes elleiciones.

Darréu intervino Pau Morales –ERC-, quien reconoció la importancia de la llabor conxunta de les estremaes naciones del estáu nel procesu de creación de repúbliques. Tamién fexo un repasu a la situación pela que pasa’l so país, recalcando la vulneración de los más ellementales drechos y llibertaes por parte del reinu d’España,  afirmando que “nin la represión, nin la violencia d’Estáu, nin los recortes de drechos sociales mos achantarán. Los pueblos que sofriemos l’Estáu decidiemos ganar. De la cayía del réxime del 78 ñacerán les Repúbliques de pueblos llibres!”

 

Nesi mesmu sen s’espresó Llucía Fernández, candidata d’Andecha Astur, al dicir que “El camín pa finar col Reinu d’España pasa por declarar la República Asturiana. Dende los pueblos del Estáu tendrán que ñacer les repúbliques que presllen la transición, finando col Reinu d’España y presllando un ciclu hestóricu. ¡Dende Asturies ñacerá la República, y sedrá soberana!”.

Tamién recalcó la importancia de sumar fuercies, dar la cara y “nun se quedar a mirar nin a esperar istruciones dende Madrí” nun intre críticu social y políticamente. “Dientro y fuera d’Asturies, ye tiempu de sumar fuercies, y ye por ello qu’Andecha Astur preséntase énte’l pueblu asturianu comu una ferramienta d’organización que permita xunir fuercies p’avanzar hacia una República Asturiana na que’l pueblu seya, otra vegada, soberanu” afirmó.

Tres les intervenciones polítiques tuvo llugar un homenaxe floral y musical na puerte la “Casa Blanca”, onde tuvo asitiáu el Conseyu Soberanu d’Asturies y Llión, el postrer gobiernu democráticu d’Asturies, como recordó’l presentaor del actu, Mariu Arbesú.

Redaición InfoAsturies

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies