Iniciativa pol Asturianu vien de presentar una quexa formal al Conceyu de Siero y a la Conseyería d’Infraestructures, Ordenación del Territoriu y Mediu Ambiente polos últimos cambeos de señalización na parroquia de La Collá qu’incumplen la toponimia oficial na señalización
L’asociación pide nos escritos presentaos al conceyu y al “Principado” la reposición de la señalética colos nomes tradicionales de la parroquia y denuncia que la señal de la carretera onde apaecía’l topónimu, yá derogáu, La Collada foi eliminada, pero nun se sustituyó por una señal nueva, quedando ensin señalar la entrada a la parroquia de La Collá, siendo esti el topónimu oficial. Anque la instalación y caltenimientu de les señales na carretera AS-248 son competencia del Gobiernu del “Principado” ye responsabilidá del Conceyu de Siero tar xixilante y facer cumplir de la llexislación nel so territoriu.
Por otra parte, Iniciativa pol Asturianu fae público tamién que les dos señales del llugar de Güergu, perteneciente a la parroquia, apaecen de forma incorrecha como Güergo.
Nesti sen hai que recordar que la Llei 1/1998, de 23 de Marzu, d’usu y promoción del bable/asturianu diz nel artículu 15.1, relativu a los topónimos que “los topónimos de la Comunidá Autónoma del Principáu d’Asturies han tener el nome oficial na so forma tradicional”. Y nesi sen, los topónimos oficiales son La Collá y Güergu.
Dende Iniciativa pol Asturianu piden la istalación de les nueves señales, dando cumplimientu d’esta manera a la Llei 1/1998 y a la toponimia oficial aprobada, d’acuerdu col decretu 104/2009 del BOPA de 29 de xunetu d’oficialización de la toponimia del conceyu de Siero.
Redaición InfoAsturies
This work is licensed under a Creative Commons Attribution 4.0 International License.
