Dificultaes llingüístiques pa l’atención telefónica nel 112

  • 6 Marzu, 2019

Recoyemos la quexa d’una llectora que se pon en contautu con nos pa informar d’una incidencia col teléfonu d’emerxencies 112 na que s’evidencia les consecuencies de la inorancia llingüística y xeográfica de los servicios d’atención al públicu

El pasáu domingu 3 de febreru a les siete la tardi, en plenu espoxigue de la fola d’incendios qu’ambura Asturies, M.M.L. llama al 112 pa informar d’un práu ardiendo ensin control a la vera la biesca. Tou paez indicar que se trata d’una quema de broza que se ta estendiéndo, a gran velocidá, pela fastera, con al menos cinco focos de considerable tamañu que’l vientu esparde rapidamente.

Lo primero que llama l’atención a la nuesa llectora ye’l tiempu d’atención de llamada: 22 tonos anantes de coyer el teléfonu “una eternidá, namás pensar que si llamare por un ataque, un acidente o un infartu morría anantes”. L’altu númberu d’incendios rexistraos esa tardi puede tar na causa d’esa tardanza.

Cuando garren el teléfono, M.M.L. relata lo que ve, indicando la so ubicación y que dende la carretera onde ta “vese un prau con dellos fueos al par de la biesca”, ante lo que la telefonista amuesa la so incomprensión. La información ye repitía otres tres vegaes, ca vegada más ampliada, con tonu más altu y más selemente, pa facese entender. A la fin la so fia, que l’acompanga, xuxuria: “nun pescancia l’asturianu”. Efeutivamente, la persona qu’atiende nun sabe lo que ye un fuéu, nin un práu, nin una biesca.

Una vegada camudáu’l rexistru -la situación d’emerxencia desixía una cierta transixencia llingüística- toca la desplicación xeográfica: “En Xixón, cerca de Pinzales, vese dende la carretera Fontaciera, mirando pa Arroyo a l’altor de la Sidrería Principado”. Tornen los problemes ¿arde una sidrería? ¿l’incendiu ye en Pinzales? ¿en qué barrio queda Fontaciera? ¿Hai un arroyo?.

Finalmente la telefonista decide que la cuestión ye asuntu de los bomberos y pon direutamente a M.M.L. en contautu con ellos. “Hai un fuéu cerca de Pinzales, garrando la carretera Fontaciera, un práu con dellos fueos al par d’una biesca, per onde la Sidrería Principado” “¿hacia Arroyo? vamos pallá” y asina, tres d’apuntar el teléfono de la informadora, tou arregláo.

27 menutos de na más tarde, la llamada d’emerxencia foi esitósamente recoyida y, confiamos, el fuéu amatáu.

Nuria Prendes

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies