Andecha Astur decide convertir la recoyida d’avales pa la presentación de candidatura nuna oportunidá pa demostrar la voluntá republicana del pueblu asturianu
Nesta convocatoria ellectoral a les Cortes Xenerales del Reinu d’España, Andecha Astur va presentase de la man de la coallición “Agora Repúbliques”, xunto con ERC, EHBildu, BNG, Puyalón y Ahora Canarias.
Acordies la nueva reforma de la llei elleutoral, tou partíu que se quiera presentar a les elleiciones tien un plazu de venti díes pa presentar un porcentaxe de firmes que permitan exercer el drechu democráticu a presentase a les elleiciones. Nel casu d’Asturies, esi porcentaxe ronda les mil presones, una condición que dende’l puntu de vista d’Andecha ye una torga a la participación democrática, qu’afeuta mui especialmente a les formaciones de menor tamañu, qu’en munchos casos deciden nun presentase.
Convencios de cumplir llargamente esti requisitu, aprofiten la ocasión pa facer una declaración de principios en nome de los asturianos, convocando una recoyida masiva de firmes en favor de la República, col oxetivu final d’algamar 10.000 sofitos “pa que quede nidio que les asturianes y asturianos apostamos dafechu pola nuesa República”.
Recalquen que la firma nun conlleva dalu compromisu, namás la conformidá con qu’un partíu políticu pueda presentase a les elleiciones, daqué que consideren un drechu democráticu básicu.
Pa participar podéis ponevos en contautu con ellos na so direición de mail: andechainfo@gmail.com
This work is licensed under a Creative Commons Attribution 4.0 International License.
