• Portada
  • >
  • Cultura
  • >
  • Naz Amosando, ciclu de presentaciones de novedaes discográfiques de música asturiana

Naz Amosando, ciclu de presentaciones de novedaes discográfiques de música asturiana

  • 28 Febreru, 2019

L-R y Xaime Martínez abren el 16 de marzu esti ciclu de conciertos en formatu íntimu, grabaos y emitíos al traviés d’Internet

Una mezcla ente un conciertu acústicu con aforu reducíu, un programa de televisión y un alderique; too ello retresmitíu per Internet pa que llegue a más persones de tol mundu. Asina ye Amosando, el ciclu de presentaciones de discos entamáu por Musicasturiana.com que va escomenzar el 16 de marzu en Xixón col conciertu/grabación de L-R y Xaime Martínez y al que van siguir en 2019 otres cuatro actuaciones/emisiones.

Un proyeutu pa visibilizar a la música asturiana dientro y fuera de les nueses fronteres; una ferramienta promocional adautada a los vezos actuales de consumir música; una iniciativa pionera n’Asturies influyía por otres esperiencies asemeyaes exitoses notres partes del planeta. Éstes son les carauterístiques coles que naz Amosando pa intentar valtar ún de los más grandes problemes que tien la música asturiana: la poca promoción.

D’esta manera, Amosando nagua por ufrir daqué orixinal y prestoso, con un formatu nel que los artistes van tocar los cantares del so discu más nuevu énte un público reducíu que va poder entrugar y aldericar col artista en vivo, p’asina fomentar la cercanía y interrelación ente los músicos y los sos siguidores. Los conciertos van grabase, van emitise en formatu audiovisual per Internet y van promocionase activamente al traviés de les redes sociales pa que se puean ver dende cualquier llugar del mundu.

 

Artistes y organizadores

El 16 de marzu entama esti ciclu cola participación de L-R, dúu post-folk formáu por los reputaos músicos Rubén Bada y Leticia Baselgas, y de Xaime Martínez, proyeutu en solitariu del cabezaleru de La Bande qu’axunta música indie, folk, canción d’autor y poesía. Van presentar los sos discos espublizaos el pasáu avientu: ‘Post-Folk-Asturianu’ y ‘Ósculos d’Agua nel Imperiu Asturianu’, los dos nominaos apocayá a los Premios AMAS nes categoríes de Meyor Discu Folk y Meyor Canción Folk. Les entraes son de baldre y van sortease ente quienes participen nun concursu llanzáu por Musicasturiana.com.

Otres cuatro actuaciones/emisiones por anunciar van ser la continuación nel 2019 d’esti ciclu entamáu pola tienda online y distribuidora dixital Musicasturiana.com, grabáu pol realizador Javier Lueje nos sos estudios de Xixón y producíu por Goxe Producciones. La primera d’estes emisiones ta patrocinada pola estaya de Turismu del Conceyu de Xixón, por Caxa Rural d’Asturies y por Borines Selección d’Agua de Borines.

Redaición InfoAsturies

 

 

 

 

 

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies