La movilización allonxóse del cientru de la ciodá pa facese ver nel barriu de la Calzada, escenariu principal de los problemes denunciaos na mesma

La mocedá xixonesa nun traga’l cuentu de que pa crear emplegu ye imprescindible aguantar niveles de contaminación perriba de lo que ye soportable pa la salú. De fechu, fasta agora el casu ye más bien a la contra, la polución remanez y los emplegos van finando. Esto ye aplicable a Asturies entera, a Xixón y mui especialmente a la fastera Oeste, la más castigada por tolos problemes denunciaos: contaminación, desemplegu y niveles de probitú que torguen l’acesu a los suministros básicos.

Son ellos, la mocedá del barriu, los que crearon la Rede Xixón Oeste y convocaron en menos d’un mes esti manifestamientu que consiguió movilizar a un millar de presones.

Les sos revindicaciones son ambicioses, pero xustes: una solución a la crisis industrial, social y mediuambiental que vive Asturies, a traviés de la creación d’empreses que vengan a reemplazar los puestos de trabayu perdios nes “reconversiones”, proteición de los productos del país pa frenar la desllocalización, la obligación d’implantar medios teunicos que filtren y/o frenen la emisión de contaminantes, alternatives llimpies a la produción d’enerxía y abaratamientu de la lluz ya’l gas pa garantizar l’acesu a los mesmos de la población.

This work is licensed under a Creative Commons Attribution 4.0 International License.