L’ Academia de la Llingua Asturiana presentó en comuña con Iniciativa pol Asturianu el poemariu Aire, fuego y deseo de Juan Carlos Gracía Hoyuelos, escritu n’estremaes llingües del estáu, comu l’asturianu, valencianu o aragonés
Dende va años, Juan Carlos García Hoyuelos, autor d’esti poemariu políglota, vien poniendo atención nel asturianu dientro de la so esmolición poles llingües que nun tuvieron la suerte hestórica que tien la que ye la so llingua materna, l’español, amosando una sensibilidá pocu avezada, mui contraria a los discursos del odiu y el despreciu que carautericen a los movimientos contrarios a la oficialidá.
Nel actu, que tuvo llugar na sede de la mesma academia, recitáronse poemes d’Aire, fuego y deseo, nes voces de Xosé I. Pidal Montes (poeta), Nicolás Bartolomé Pérez (escritor lleonés, miembru de l’ALLA y Faceira), Quique Díez Fernández (estudiante de filosofía), Fernán Morán Suari (presidente de la Lliga Celta d’Asturies) y Víctor Suárez Piñero (escritor). Darréu sintióse’n direutu a Toli Morilla, col so tema Magar la distancia, incluyíu nel CD d’Aire, fuego y deseo, col que’l propiu cantautor asturianu collaboró.
Especialmente sentía foi la intervención nel actu d’Inaciu Galán, presidente d’Iniciativa pol Asturianu “Ye clave siguir amosando que del llau de la oficialidá tamos los que construyimos una Asturies meyor, más plural, más bayurosa, más respetuosa col diferente”.
Redaición InfoAsturies
This work is licensed under a Creative Commons Attribution 4.0 International License.
