El númberu de representaciones que sumaben el “circuitu” (funciones programaes n’actuaciones pelos conceyos del país) y la “Axenda Didáutica”, agora suprimies, algamaben alrodiu les 600 actuaciones al añu. La so desapaición implica el desaniciu de fasta’l 60% de los puestos de trabayu venceyaos a esti arte, que pasa por un intre especialmente bonu no que cinca a calidá, pero duru no que ye les condiciones llaborales y númberu d’actuaciones.

L’añu pasáu representáronse n’Asturies 32 funciones menos que l’anterior, 1.431 en total, de les que 979 correspondieron a compañies asturianes. Pal 2019 calcúlase un másimu de 800, lo que dexará ensin ingresos a más de la metá de los profesionales teatrales asturianos, un retayu que dengún seutor puede permitise y que, nel teatral, recae nun escenariu (nunca meyor dicho) ya inestable y castigáu económicamente.

El guelpe aporta nun intre consideráu polos espertos comu un de los meyores momentos artísticos de la escena asturiana, por mor del fuerte texíu formáu pola collaboración de los sesenta grupos profesionales de teatru -amás de los abondos amateurs– y pola presencia de profesionales con muncha esperiencia al llombu. L’añu pasáu batiéronse records d’estrenos, con na menos que 38, nueve más que nel añu anterior.

Nuria Prendes