Los datos apurrios pol Sadei sobro’l movimientu natural (ello ye, la relación pente muertes y ñacencies) de la población asturiana nel 2.018 apurre la menor cifra de recien ñacios, namás 5.785, superándose por primer vegada la llende de los 6.000 ñacimientos añales, al tiempu que coles 13.297 muertes algámase la segunda mayor cifra recoyida dende’l 1975. El saldu ye apavoriante: 7.512 asturianos menos, datos que nun se vien dende los años 1940 y 1945, en plena posguerra.
El Sadei nun interpreta estes cifres sinon qu’apurre los datos de manera oxetiva, espeyando nel so avance de los datos que “Por primer vegada na hestoria Asturies rexistra menos de 6.000 ñacimientos nel añu”. Tampoco inclui nel so informe los datos relativos a la perda de población por emigración, datos que fadríen subir la cifra mui perriba de los diez mil asturianos menos nesti caberu añu.
Nun hai previsión de que les cifres meyoren nos prósimos años, nuna Asturies avieyada na que la mocedá nun cuenta cola estabilidá abonda pa plantegase una familia y les espeutatives llaborales nun garanticen l’acesu a la vivienda nin a un nivel de vida dignu.
Llucía F. Marqués
This work is licensed under a Creative Commons Attribution 4.0 International License.
