El pasáu xueves 31 de xineru presentóse la campaña estatal Xuiciu a Martín Villa, que busca acabar cola impunidá de los crímenes del franquismu y que centra l’oxetivu na persona de Rodolfo Martín Villa, responsable políticu nos años posteriores a la muerte del dictador Franco

Ruedes de prensa simultánees en Barcelona, Madrid, Pamplona-Iruñea y Vitoria-Gasteiz dieron a conocer esta iniciativa, anque la campaña va llevase alantre en más comunidaes del Estáu: amás de n’Asturies, en Valencia, Andalucía, Aragón, Galicia…

Nos años 60 y 70, nel Estáu español había un movimientu obreru, vecinal, cultural, nacionalista, feminista y estudiantil mui potente que reclamaba drechos democráticos y llibertaes. Na dictadura franquista, y nos primeros años de la Transición, usóse tol aparatu represivu del Estáu p’acabar con esti movimientu social tan impresionante. Amás, la llei d’Amnistía de 1977 garantizó la impunidá a tolos responsables de la represión.

Rodolfo Martín Villa foi ún de los artífices principales d’esa política represiva. Cuando él yera ministru, cometiéronse crímenes tan graves como la masacre del 3 de marzu en Vitoria-Gasteiz o l’asesinatu de Germán Rodríguez nos sanferminos de 1978, amás d’otros munchos socedíos a lo llargo y ancho del Estáu español. Naquel tiempu, n’Avilés, un trabayador d’Ensidesa recibió, pela espalda, un disparu de la policía cuando taba faciendo una pintada.

La iniciativa Xuiciu a Martín Villa quier denunciar esto y demandar nos tribunales del Estáu español les responsabilidaes civiles, polítiques y penales pol so papel naquellos años. Hai que recordar que Martín Villa yá ta imputáu nos tribunales d’Arxentina por crímenes contra la Humanidá, anque la Fiscalía Xeneral del Estáu emitió una instrucción a los demás fiscales pa impidir l’enxuiciamientu de cualquiera de los imputaos, amás de la tramitación de les pidiciones d’interrogatoriu.

Redaición InfoAsturies

This work is licensed under a Creative Commons Attribution 4.0 International License.