Los sondeos pa los qu’hai permisos concedios afeuten ya a 16 conceyos: L.lena, Morcín, Quirós, Riosa, Proaza, Bual, Ayande, Tinéu, Cangas, Valdés, Illano, el Franco, Belmonte, Castropol, Tapia y agora Ibias, sumando un total de más de 275 millones de metros cuadraos de superficie nos que se pueden realizar sondeos col mínimu control
Nel BOPA recuéyese lo que, pa la Coordinadora Ecoloxista d’Asturies, ye un nuevu ataque pal mediu ambiente asturianu, al aprebar los permisos pa realizar prospeiciones mineres d’oru, plata, plomu y zinc sobro una superficie de 4,8 millones m2 nel conceyu de Bual. El territoriu afeutáu alcuéntrase na Sierra de Busto, pente los ríos Llinares y Bustelin.
Na franxa na que se quier buscar oru ya se fexeron docenes de sondeos nes caberes décades, enllenando de furacos la fastera, a los qu’habrá que sumar otros siete, de 150 a 250 metros de fondura.
Balsa cianurada’n Belmonte
En casu de que les prospeciones foren positives, el problema sedría mayor entá: la minería d’oru asturiana precisa de grandes movimientos de mineral pa consiguir gramos por tonelada, nel meyor de los casos, xenerando grandes movimientos de tierres, estroces y abondosos residuos, al utilizase sustancies mui contaminantes pa concentrar los metales, comu ye’l casu de Belmonte, onde carecen les consecuencies de les balses de residuos cianuraos, con un vida estimao de 75 años de tosicidá.
Llucía F. Marqués
This work is licensed under a Creative Commons Attribution 4.0 International License.
