Ante la falta d’intervención por parte les alministraciones pa garantizar la llimpieza de les sableres asturianes, l’Asociación Biodevas entama una recoyía de residuos na sablera de Cueva

El díi 26, de magar les 11:30 hores, aportarán los voluntarios que quieran participar na recoyida de basoria d’esta sablera, especialmente perxudicada pola cantidá de residuos. Pa facilitar la organización, recomiéndase la iscripción previa nel mail  de los organizaores.

Anantes de la recoyida tendrá llugar una charra informativa y presentaráse a los asistentes una bona nueva de la qu’entá nun quixeron dar alantru.

Con esta xornada de trabayu, Biodevas, asociación creada por y pa persones non espertes en temes medioambientales pero esmolecios pola natura y que quieren aportar el so granín a la meyora de la mesma, non solo pretenden dexar llimpiu esti espaciu natural, sinon sobremanera llamar l’atención sobre’l llaceriosu estáu nel que s’alcuentra esta y otres sableres d’Asturies, reclamando asina una actuación de les alministraciones y la contratación d’un grupu de llimpieza que faiga periodicamente esti trabayu. Tamién se quier concienciar a la población pa que seyan responsables cola so xestión de la basoria, amenorgando el so impautu sobro’l mediu ambiente.
Nun ye la primer vegada qu’esta asociación entama una actvidá d’esta triba, pero si la vegada que más al Occidente s’averen “queremos siguir llegando a mas xente y collaborando con grandes persones, como The Wandering S que fue la iniciadora y gran collaboradora pa desendolcar esta recoyida… Esperamos qu’esto seya namás l’entamu d’un gran equipu, por que d’un n’un nun podremos, pero sumando fuercies algamaráse’l cambeu”.

Redaición InfoAsturies

This work is licensed under a Creative Commons Attribution 4.0 International License.