MUSOC 2019 consolídase na so séptima edición como un referente del cine social para’l compromisu y l’aición
Del 7 al 28 de xineru, Aición Rede entama un añu más l’Amuesa de Cine Social y Drechos Humanos d’Asturies (MUSOC 2019), una iniciativa consolidada nel panorama cinematográficu asturianu, frutu de les aliances ente delles entidaes y coleutivos sociales que sumen les sos fuercies nesta xera colectiva.
L’envís d’esta amuesa ye averar al espectador, al traviés d’una filmografía perescoyida, “a estremaes realidaes, prósimes y allonxaes dende l’analís, la comprensión y l’interpretación del mundu nel que vivimos”.
Les obres, estremaes en cuatro temátiques dixebraes, inclúin fición y non fición, en formatu curtiu y llargu. Na estaya Periferies faise “una invitación a conocer les nueses llendes al traviés de la gran pantalla, la nuesa hestoria, desafíos y moliciones, una llamada p’averanos al cine y a la vida que s’atopen nos marxes”. Otra estación esquiza na realidá de les persones migrantes y a la gueta d’abellugu nel contestu d’una sociedá que s’alderica güei ente l’aspiración a un mundu más xustu o la indiferencia. Les realidaes LGTB van presentase na estaya Tránsitos, reivindicando drechos y franciendo prexuicios como camín escontra la igualdá. Finalmente, Creadores mirando al Sur va dar el protagonismu a muyeres cineastes, qu’al traviés del so cine proponen camientos cargaos de compromisu social y una mirada crítica en clave de xéneru.
La primer proyeición va ser l’estrenu de la película “Génezis” el 17 de Xineru, a les 20 hores nel Nuevu Teatru de La Felguera. A otru díi va ser el Cine Felgueroso de Sama el que va acoyer “Hayatí”, tamién estrenu en Asturies; va ser a les 19:30.
Tamién nel Teatru de La Felguera, el 24 de Xineru a les 20 hores, va proyeutase “La Tercer Esposa” (Meyor película asiática nel Festival de Toronto y estrenu n’Asturies). L’amuesa va presllase col documental “Puta Mina”, siguíu d’un alcuentru col públicu de les sos directores: Mercés Ordás, Raquel Balbuena, Mari Fernández y Laura Alonso, del coleutivu “Puta Mina”, so la tema Diariu Violeta de la Minería”. Va Ser el 25 de xineru a les 19:30 hores nel Cine Felgueroso de Sama.
Redaición InfoAsturies
This work is licensed under a Creative Commons Attribution 4.0 International License.
