Pa l’Asamblea de Trabayaores de Duro Felguera, Susana ye víctima del avezáu sistema d’amedranar al pueblu al traviés d’un “castigu exemplar” a aquelles persones que más se muevan en defensa de los drechos
Susana Fernández yera vocera de los trabayaores de Duro Felguera dica’l so despidu, que foi tramitáu “por xides disciplinaries” anque, acordies los trabayaores, estes acusaciones nun tienen bas nin esiste dala preba contra ella. El xueves 9 d’Avientu a les 18:00 na puerte principal de la Casa Sindical de Xixón tendrá llugar una concentración y rueda de prensa cola qu’entamen les movilizaciones de sofitu a la vocera de los trabayaores de Duro Felguera; los mesmos repitiránse ca xueves dica’l díi previstu pal so xuiciu, esautamente un mes depués.
Con estes concentraciones los sos compañeros d’empresa quieren amosar el so sofitu ante lo que consideren un actu arbitrariu col que “se trata d’amedranar a los y les trabayaores pa que nun denuncien la situación”.
Acordies l’Asamblea de trabayaores de la que Susana yera vocera, el so únicu “delitu” foi “denunciar a los cuatro vientos que los que fundieron la empresa siguen atechaos viviendo d’ella” y creen que la so realmisión ye inevitable, ante la falta de prebes a la escontra de l’acusada.
Amás d’a los trabayaores de Duro Felguera, llamen a participar nes movilizaciones a tola clas trabayaora asturiana, porque “Si toquen a una, tóquenmos a to@s”.
Llucía F. Marqués
This work is licensed under a Creative Commons Attribution 4.0 International License.
