Carta a los Reis Magos d’una muyer ganaera

  • 8 Xineru, 2019

Nun sabemos si-y lo traxeron o si van traeilo, pero hai falta agabitar a la mocedá dimpuesta a lluchar pol país y sabedora de que continuar cola vida en monte, anque duro, paga la pena

Garrao del Facebook Ganaeres Asturianes

 

Queridos Reis Magos:
Esti añu voi pidivos un deséu especial. Gustaríame que cuando teáis repartiendo pel mundu, alcordéisvos d’esta tierra tan verde y tan guapa na que vivo. Dende chica viví arrodiada de ganáu nun pueblu nel monte y cuando tenga fíos quiero que puedan criase igual que yo. Creo que la meyor vida que puedo da-yos ye nun pueblu. Anque agora tea estudiando fuera por unos años, quiero volver y quedame a vivir equí pa siempre. El problema ye que siento que cada vez ta más complicáu vivir nuna zona rural y dedicase al campu. Por eso necesito que m’ayudéis a conseguilo.
Va unos meses na facultá pidiónos una profesora qu’escribiéramos nun papel un deséu pal futuru. La mayoría pidíen ésitu nel trabayu o muncho dineru. Yo escribí que quería tener varios críos y vivir nun pueblu de monte con ellos. Esi ye’l mio deséu de verdá.
Tamién me gustaría, queridos Reyes, pidir un futuru meyor pa la ganadería. Los mios hermanos quieren dedicase a ello y espero que puedan tenelo fácil. ¿Nun vos paez qu’esti ye un oficiu guapu y necesariu? El problema ye qu’esti ye un trabayu duru, de 365 díes al añu ensin descansos nin vacaciones. Por eso quiero pidivos a vós, Melchor, Gaspar y Baltasar, un porvenir meyor. ¿Podréis facer que los rapacinos que quieran ser ganaderos lo consigan? Asina, habría munchos homes y muyeres trabayando n’esti trabayu. Ye tamién un trabayu tan guapu nel que se pasa tiempu con animales y vívese por y pa ellos.
Yo nun cambio el pueblu míu por nada. Crecer nun entornu rural fue lo meyor que me pasó na vida y espero vivir toa la vida equí. Dame pena que cada añu seamos menos en pueblu pero espero que cola vuesa ayuda, la Asturies rural dexe de despoblase. Una cultura milenaria como’l pastoreo nunca tien d’estinguise. Nun queremos acabanos.
Con esto, despídome y vos deseo bon viaxe. Espero que podáis cumplir los deseos de toos.
Un besu,

Lena de Villa de Caldueñu

This work is licensed under a Creative Commons Attribution 4.0 International License.

1 Comment Already

  1. Una carta perguapa y emotiva. Aguardo que te concedan una pitición tan xusta y granible p’Asturies, pa la so ideosincrasia.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies