Nel homenaxe fechu por Andecha Astur, delantre la placa que lu recuerda nel cimenteriu Deva, tuvo llugar una llectura comentada de dellos de los sos testos y poemes, amosando con ello que les sos idegues y les pallabres que dexó escrites siguin vixentes 34 años depués
De la man de la so obra lliteraria, la intervención política de Llucía Fernández foi repasando l’actual situación social, llaboral y demográfica d’Asturies, atopando, nes palabres escrites por Andrés Solar hai más de 30 años, una descripción cuasique “profética” de la situación que’l país carez anguañu.
Les referencies a la obra d’Andrés Solar foron el filu conductor que llevó a la oradora a traviés de la necesidá de la llucha y la xunidá de los asturianos, de los pelligros qu’escuende’l falsu discursu del miéu, de les traiciones de los partíos españoles n’Asturies y mui especialmente del pruyimientu por un pueblu llibre y una República Asturiana.
Un intre de la llectura
Precisamente mentes lleía l’hestóricu poema “Prúyemos un Pueblu Llibre” Llucía Fernández tuvo de facer una pausa al aportar al versu “Xunto la fábrica encesa,/ la mina prieta, la mar…” al remembrar que, precisamente el díi anantia, el Reinu d’España presllare dos de les tres postreres mines asturianes, con pallabres perdures pa los sindicatos, el “Principado” y sobro tou pal presidente español, Pedro Sánchez, que recientemente afirmare qu’ello diba acarretar prosperidá “Prosperidá pa los Villa, pa la Mafia político-sindical asturiana que cobró por collaborar nel preslle de la minería asturiana, pa la Mafia’l PSOE-SOMA-UGT; prosperidá pa Madrid que se quedó colos más de los Fondos Mineros, prosperidá que ye miseria p’Asturies, pa los asturianos”
L’actu d’homenaxe a esti nacionaliegu asturianu que, al so compromisu social y políticu, amestó una obra lliteraria autodidacta y n’asturianu d’especial valir, siendo miembru fundaor del Ensame Nacionalista Astur y académicu de la llingua asturiana, finó con una ufrienda floral ya una llectura abierta de los sos poemes. Darréu l’actu, y de manera espontanea, surdió pente los presentes un interesante alderique so la hestoria reciente del nacionalismu asturianu, de la qu’Andres Solar, xunto con dellos de los asistentes al actu, fore protagonista.
Nuria Prendes
Toi buscando la manera de dicite qu'hai milenta razones que se llamen como tu. Y qu'esperen por ti, qu'esperen por ti. ----------------- A vegaes camiento cansáu que nin siquiera sabrán que tuviemos equí, asoleyando un país que cayó una nueche a la mar, y na mar y na nueche lu quixeren dexar. ------------------- Nin siquiera sabrán que tuviemos equí cola voz y les manes falando d'amor, falando de ti, falando de ti. -------------------- Pero ye igual, hai que facer del argayu un fueu, del vientu un hermanu qu'esparda’l calor, qu'esparda’l calor. -------------------- Hai que siguir asina y equí. Hai que siguir, hai que siguir
This work is licensed under a Creative Commons Attribution 4.0 International License.
