Un añu más Andecha Astur honra la memoria del poeta asturianu Andrés Solar (1955/1984) conocíu pol so compromisu con Asturies, que tan bien supo espeyar nos sos poemes
Esti sábadu 29 d’Avientu, a la una del mediudíi nel Cimenteriu de Deva la familia del escritor y Andecha Astur –heriedera del ENA, organización fundada por el poeta- homenaxearán, como cada añu, la so figura. Quieren destacar d’elli non solo el so valir lliterariu, sinon y sobre tou, el personal y políticu, ya que “suel tapecese’l so fondu compromisu políticu que lu llevó a ser miembru fundaor del Ensame Nacionalista Astur, presentándose por esi partíu como candidatu a la Xunta Xeneral”.
Nel homenaxe fadráse una ofrenda floral y músical, lleéndose darréu dalgunes de los sos poemes más conocíos frente a la placa que la organización llantó hai años a la entrada del campusantu.
Amás de ser miembru fundaor del Ensame Nacionalista Astur, Andres Solar Santurio foi profesor de llingua asturiana na UP de Xixón, espublizó articulos en prensa, ganó premios lliterarios, foi miembru de l’Academia de la Llingua, collaboró col grupu Xaréu Títeres de teatru, foi tesoreru de l’Asociación d’escritores Asturianos y miembru de Conceyu Bable y de Xunta pola Defensa de la Llingua Asturiana, siendo en tou momentu un referente pola so implicación, capacidá de trabayu y cualidaes presonales. Andrés Solar Santurio algamó na so curtía vida merecíu reconocimientu como autor, finando traxicamente con namás 29 años, dexándonos escrites estes prestoses pallabres:
Vamos dexar de vivir
de gaita sidra y tambor,
de la Santina na cueva
y de castros baxo’l sol.
————————
Óyense voces falando
de pueblos y llibertá,
de roses llorando espines,
de palombes y un riscar.
———————–
Xunto la fábrica encesa,
la mina prieta, la mar
y la secha ensin llabrar:
asperámoste pruyendo
por vivir pallabres vieyes
comu pueblu, home y llar.
————————-
Prúyemos un pueblu llibre:
que ñome cola xo voz
los sos collacios y el pan.
Prúyemos un pueblu llibre
y una Asturies dixebrá.
This work is licensed under a Creative Commons Attribution 4.0 International License.
