La formación política considera urxente esclariar l’orixe del carbón qu’aporta a la sablera xixonesa y poner medios pa finar con estos episodios contaminantes
Al traviés de la collaboración qu’Andecha Astur caltién, por mor de la so presencia en Los Pueblos Deciden, con EH Bildu, Jon Iñarritu, senaor de la organización vasca, vien de presentar nel Senáu delles entrugues coles que pretenden determinar con certidume cual ye l’orixe de les descomanaes manches de carbón qu’apaecen periódicamente na sablera xixonesa de San Llorienzu, de magar el fundimientu del Castillo de Salas, ya va más de 32 años y que nos tiempos caberos vien atribuyéndose tamién a la descarga de carbón proveniente d’otros países nel puertu d’El Musel, ya inclusu al parque carbones.
La desinformación ye xeneralizada, con contradiciones nes versiones del Incar –Instituto nacional del carbón- y del propiu Ayuntamientu Xixón, polo qu’ Andecha Astur entrugó al Senáu español sobro la esistencia d’estudios respeutu a la procedencia d’esti carbón y en casu de rempuesta afirmativa, cuales son les conclusiones d’esos estudios. En casu de nun haber conclusiones al respeutu, tamién entrugaron cuales sedrán los pasos que van dase pa determinar l’orixe d’esi carbón, a la muera de qu’ello pueda permitir determinar responsabilidaes por estos fechos –acullá de les polítiques-, y puedan tomase les midíes afayaíces pa finar con esti problema.
Redaición InfoAsturies
This work is licensed under a Creative Commons Attribution 4.0 International License.
