• Portada
  • >
  • Conceyos
  • >
  • Los Ayeranos pagarán 20.336 euros polos vertíos al Ríu Braña

Los Ayeranos pagarán 20.336 euros polos vertíos al Ríu Braña

  • 5 Avientu, 2018

Les irregularidaes nos vertíos del coleutor que vierte de continuo agües residuales al ríu pagaráles el conceyu, al ser el mesmu de titularidá municipal

La Confederación Hidrográfica del Cantábricu vien de notificar la so resolución na que se impón al Conceyu d’Ayer una sanción por un total de 20.336,72 euros, en conceutu de multa y de daños y perxuicios al Dominiu Públicu Hidráulicu, por mor del arramáu continuu d’agües residuales al calce del ríu San Isidro, procedentes de los núcleos de Felechosa ya El Pino, ensin cuntar pa ello cola preceutiva autorización alministrativa d’esti organismu.

La sentencia recueye tamién que siendo l’Ayuntamientu  el titular del coleutor a traviés del que se ta xenerando el vertíu oxetu de denuncia, ye esti organismu el culpable de la falta de dilixencia y poro responsable de la infración. Por ello, imponse-y una multa de 10.000,01 € que se suma a los otros 10.336,72 correspondientes a daños y perxuicios al Dominiu Públicu Hidráulicu. Nun ye la primer sanción d’esta triba qu’asume el Conceyu, que tien más espedientes en marcha.

La Coordinadora Ecoloxista d’Asturies, que fueron los que denunciaron la irregularidá, quier llamar l’atención sobre les sos reiteraes denuncies feches sobre la falta de saneamientu y de depuración de los vertios de la residencia de La Minería de Felechosa, cuestión que puede tar relacionada col Casu Hulla ya’l posible delitu de prevaricación na concesión de la llicencia d’obres pal xeriátricu del Montepio de Felechosa. El proyeutu anicial d’obres prevía y presupuestaba una depuradora qu’a la fin nun se costruyó, faciéndose en cambiu un coleutor que lleva los arramaos a una rede municipal que, acordies la Confederación, nun tien sistema de depuración nin d’autorización de vertíu. Les perres destinaes a la depuradora nun se descontaron del presupuestu del proyeutu, apurriéndose integro al Montepío.

Redaición InfoAsturies

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

This site uses Akismet to reduce spam. Learn how your comment data is processed.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies