El Nivel 0 de Contaminación por partícules contaminantes tien d’activase cuando se superen les llendes de 25 µg/m3 tres díes siguíos, pero Uviéu lleva cuatro superándoles ensin que s’actúe en consecuencia
Nel Conceyu d’Uviéu lleven dende’l pasáu martes careciendo concentraciones de Pm 2’5 (les partícules de menor tamañu y poro más peligroses por entrar más fondamente nel aparatu alendatoriu) superiores a les permities. En concreto, la estación de Ventanielles presenta güei una media de 27 µg/ m3, dos puntos perriba la llende d’emerxencia, con picos de fasta 75, y ayer aportaba a los 38, un datu ya alarmante por si solu anque nun fore acompangáu d’otros tres díes de niveles altos. Amás, los niveles de bencenu estos díes tamién tan siendo superiores a lo almisible.
Sicasí, el “Principado” entá nun activó’l nivel d’alerta, coles correspondiente restricciones que torgaríen l’agravamientu de l’actual situación y que tan recoyíes con precisión nel Alcuerdu del Conseyu de Gobiernu robláu l’ún de 1 d’agostu de 2018, pol que se apreba’l Protocolu d’actuación n’episodios de contaminación del aire na Aglomeración d’Uviéu, área qu’inclui a una población de 296.455 habitantes.
En Siero y Xixón los niveles de contaminación atmosférica tamién tan superando les llendes afayaices pa la salú, con tres díes de niveles mui altos por concentración de Pm2,5. Nos tres conceyos la estratexa escoyía poles autoridaes pertinentes pa frenar la polución ye esperar a que llueva.
Llucía F. Marqués
This work is licensed under a Creative Commons Attribution 4.0 International License.
