Llucía Fernández, representante d’Andecha Astur, valora la refuga de la oficialidá pol Parllamentu Asturianu y la oportunidá de Podemos ya IU al proponer reformar l’Estatutu pa incluyir la oficialidá a sabiendes de que nun yera viable

Que’l Parlamentu asturianu refugara la propuestade reformar l’estatutu pa incluyir la oficialidá ye un guelpe pal procesu de consecución de los drechos llingüísticos de los asturianos…

Non tanto. Pa entamar, yera una derrota predecible, por nun dicir asegurada, que nun pilló a naide de sospresa, nin siquiera los mesmos que la presentaron.

Lo único que demuestra ye daqué que ya se vio n’otros campos, ello ye, el progresivu distanciamientu pente lo que quier el Pueblu Asturianu y el gobiernu que teóricamente lu representa. Los asturianos falen asturianu, lleen, escriben, sienten l’asturianu y desixen que se declare la oficialidá pa finar cola represión llingüística. Ehí tan les encuestes que lo demuestren, los manifestamientos, la desixencia continua y xorreciente del pueblu contra la sordera perenne de los que namás saben sentir les ordenes que vengan de Madrid.

Independientemente de la so posterior refuga nel parlamentu asturianu, ¿cómu valorais la propuesta de Podemos-IU pa entamar yá la reforma del Estatutu pa incorporar la oficialidá del asturianu?

Consideramos que lo que ficieron nun ye ético. Esta propuesta foi presentada a sabiendes de que diba ser refugada, y entá asina tiraron con ello palantre, namás pa rentabilizar políticamente una finxida llucha pola oficialidá. Llevamos años diciendo que, de querer estos partíos una oficialidá real, ya va tiempu que ficieren daqué al respeutu nos conceyos nos que gobiernen; nes sos manes tuvo demientres les caberes llexislatures facer avanzar los drechos llingüísticos. Sicasí deciden facelo agora, nel caberu intre y a sabiendes de la inutilidá del so xeitu: nin más nin menos qu’otra semeya pa la galería.

¿Por qué diben facer eso?

Pa xustificar la so inactividá y falta de compromisu en tola llexislatura y remanar al mesmu tiempu los votos de los asturianos, prometiendo pal futuru lo que nun quinxeron faer nel pasáu. Con ello dañen el procesu completu, marafundiando les fuercies acumulaes na defensa la oficialidá, creando resquiebres nel movimientu y dando argumentos a los seutores más reaicionarios, que pretenden caltener la situación de represión llingüística que carecemos los asturianos.

¿Entos pa vos nun ye l’intre de pidir una reforma estatutaria?

Non, comu vien de demostrase, nun yera l’intre. Andecha Astur yá denunció va tiempu que nun había qu’enfotase nuna reforma estatutaria agora mesmo imposible, nin empixar al pueblu asturianu afirmando que la oficialidá diba algamase nel 2018, cuando ye nidio que la correllación de fuercies nun lo permite. Engañar nun ye’l camín y nun val más que pa xenerar desenfotu nuna xera llarga, na que la oficialidá ye namás el primer pasu, y que nun se va algamar d’un díi pa otru. 

¿Qué camín proponeis p’avanzar en direición a esa naguada oficialidá?

Dende una perspeutiva rialista, Andecha Astur propón dende hai tiempu l’actuación ellí onde ye posible: nos ayuntamientos; y específicamente n’aquellos onde los avances en drechos llingüísticos son posibles, aquellos onde Podemos-IU son gobiernu, formen parte d’elli, o lu condicionen colos sos votos, faciéndolos cumplir coles sos promeses.

¿Diríeis que, nesi sen, nun se fizo tolo posible?

¿Tolo posible? aparte de postureo y semeyes ¿qué se fizo? a finales d’esta llexislatura, los ayuntamientos que dependen de Podemos-IU tienen reconocíos los mesmos drechos llingüísticos a los sos vecinos que los de PSOE, PP, Foro, Cs, ello ye: dengún. Nin aprebaron ordenances d’oficialidá, nin siquiera reglamentos pa permitir l’usu del asturianu, too quedó en detallinos asonsañando “sensibilidá” pal asturianu pero ensin reconocencia de dengún drechu pa los vecinos, bona voluntá ensin avances sociales nin políticos.

Otru alderique abiertu ye’l de la “Oficialidá a la asturiana” o “Oficialidá amable. Comu vos posicionais nesa cuestión concreta.

Nun hai oficialidaes d’una u otra triba, la oficialidá ye un conceutu llegal perclaramente definíu al que nun se-y tienen que poner apellíos col enfotu de tranquilizar a los seutores más retrógrados. La Oficialidá, completa, al cien por cien y con toles sos consecuencies, nun ye más que’l primer pasu y hai que dalu en firme. Andecha Astur defende una oficialidá ensin complexos pa la llingua asturiana, y acullá de la reforma d’esti Estatutu d’Autonomía que mos impunxeron dende Madrid, defende la so superación al traviés de la llibre elleición pol pueblu asturianu d’un marcu xurídicu-políticu propiu.

¿Hai motivos pal optimismu?

Hailos, la sociedá asturiana tien perasumíu’l so compromisu col asturianu y ca vegada ye más cosciente de que nun ye almisible la situación de represión llingüística que se vive n’Asturies, eso ye lo principal.