¿Ensin planes pa esti sábadu 24 de payares? A les 12.00 hores va facese una visita guiada a la esposición «Voces. La llingua n’Asturies al traviés de los sieglos» (Muséu Arquelóxicu d’Asturies, Uviéu)
Que meyor manera de pasar la mañana del sábadu qu’esfrutando de la esposición ‘Voces. La llingua n’Asturies al traviés de los sieglos’, con una visita guiada de baldre a la mesma. Más de mil años d’hestoria llingüística recoyies nuna esposición que percuerre toles etapes del asturianu, analizando les cuestiones que marcaron el so pasáu y presente y proyeuten el so futuru. Coordinada por Xulio Viejo, que destaca de la esposición el ser el primer rellatu ilustráu y global de la llingua asturiana, la esposición cunta na parte académica cola participación de Ramón d’Andrés y Roberto González-Quevedo.
Nesti percorríu ufiértase la posibilidá d’aceder a los sos conteníos, amás de n’asturianu, n’español ya inglés al traviés de códigos QR. Pa participar d’esta visita guiada, ye preciso apuntáse nel teléfonu 985.10.67.41 o nel mail splnormalizacion@asturias.org
Redaición InfoAsturies
This work is licensed under a Creative Commons Attribution 4.0 International License.
