Entrevistamos a Pablo Und Destruktion -anantes Pablo García Díaz- en víspores de la presentación de la so primer novela, la “Bestia Colmena”, que va tener llugar esti sábadu 24
Pablo Und Destruktion ye conocíu musicalmente polos sos trabayos como cantautor, pero nesta ocasión nun se conforma cola música y da el pasu al universu de la lliteratura cola so obra “La Bestia Colmena”, una obra irónica qu’él mesmu define como “la materialización de tol viciu y perversión de la humanidá, De tolos sos mieos y les sos altaneríes”. Ende queda eso. Les pistes que nos dan dende’l so editorial, Furtiáu y Ortega, tampoco resulten más tranquilizadores:
“La llucha contra’l Malinu ye inaplazable, el fin de los tiempos avérase… La Bestia Colmena ye la primer novela-profecía de Pablo Und Destruktion. Una nueva páxina nel personalísimu relatu vital y artísticu d’un cantautor comprometíu, disidente, n’ocasiones daqué faltosu, equí más humorísticu que nunca, pero que siempres entona col ruxíu altu y claro. Una cruzada a calzón quitáu en nome de la sedución, el baille garráu, el carisma y la guapura; un irónicu viaxe de ultratumba a la caza de la traición y el mal gustu, dende Asturies al infiernu”.
La presentación del llibru va tener llugar el sábadu 24 nel Toma 3 (Xixón), a les 13:30, dientro’l marcu del Festival de cine de Xixón; l’actu va cuntar con más d’una sopresa y dalguna qu’otra cara conocida.
IA – Nun puedo negar que la noticia de que pasabes de la música a la novela espertóme cierta intriga, anque tien xacíu, teniendo en cuenta lo trabayao de les tos lletres. Cúntanos, a nivel personal, ¿qué foi lo que te decidió a dar el pasu escontra la lliteratura?.
PuD -Taba empezando a facer cantares de más de 10 folios y eso yera insostenible, tenía que pasar a otros formatos.
IA – ¿Cuántu lleves escribiendo? ¿ye la to primer obra -cantares aparte-?
PuD – Esti llibru tuvi escribiéndolu mientres trés años, coles poses lóxiques. Primero tomó forma d’obra de teatru, que representemos en priváu un par de vegaes, hasta que finalmente acabó de cuayar como novela. Ye lo primero qu’espublizo, anque llevo escribiendo les mios cosiquines tola vida.
IA – ¿Quién ye’l to autor favoritu? ¿sirvióte d’inspiración?
PuD – Colos autores pásame como colos romances… cuesta decidir por unu. Voi dicir que na novela influyéronme rusos abarrenaos como Limonov o Venedict Erofeiev y magos o similares como Eliphas Levi, Collin Willson o Jung.
IA – La to música destacarpor ser bien personal y intima… ¿na to novela vamos atopar tanto de ti mesmu o ye menos introspectiva?
PuD – Creo que ye muncho más introspectiva… Y poro, muncho más humorística.
IA – Fainos un pocu spoiler… anque yá lleimos lo que cunta la editorial, queremos oir nes tos palabres de que va “ La Bestia Colmena”
PuD – La Bestia Colmena ye la materialización de tol viciu y perversión de la humanidá, De tolos sos mieos y les sos altaneríes. Empieza a construyise polos Estaos-nación, sigue poles redes sociales y acaba colos trashumanistes asesuaos. El mio alter ego, como asturianu que ye, decide combatila y axunta a la grana del lumpen proletariáu patriu pa que lu ayuden. Y faenlo, vaya que sí.
IA – El to llibru paez contener una bona dosis de satírica tétrico nacional ¿Cuántu de Asturies hai na to obra?
PuD – Bien d’ello. Manolín El Xitanu y Tomasín formen parte de la infantería y la Santina revela al protagonista toles misiones que tien de desempeñar. Amás la novela ta apinada de referencies y cantares ástures. Ye una nueva Reconquista, vamos.
IA – ¿Cuál ye la to visión de la Asturies que vivimos?
PuD – Fantástica, anque solo seya por llevar la contraria. El nuesu mayor problema ye que nun tenemos fíos. Poro, ufierto dende equí la mio flor a quien guste y animo a tolos mios compatriotes a faer lo propio. Y que nun s’esmolezan pol dineru. Los fíos nun se faen con dineru, faense d’otra manera…
This work is licensed under a Creative Commons Attribution 4.0 International License.
