La esplotación acumula yá abondes denuncies y sanciones por contaminación acústica y ambiental asina comu por irregularidaes urbanístiques

La Coordinadora Ecoloxista d’Asturies vien de presentar allegaciones al proyeutu d’ampliación de la cantera La Belonga, en Latores (Uviéu) sobro una superficie de 30.000 m2, entrando ya nel conceyu vecín, Soto Ribera.

L’ampliación ta nesti intre en fase d’investigación, pero la cantera yá vien dando problemes d’estremada índole, recibiendo denuncies y sanciones asgaya. Per un llau tan les sanciones que vien recibiendo por mor de delitos ambientales: incumplimientu continuáu del nivel de decibelios autorizáu, emisiones de polvo superando fasta’l 200% lo llegalmente permitío y vertíu de residuos nel rellenu con materiales non autorizaos; pel otru, destaquen les illegalidaes urbanístiques, teniendo precintaes naves y molinos illegales costruyios ensin permisu.

La falta de solución d’estes graves deficiencies podría ser incompatible cola ampliación plantegada pola Direición Xeneral de Mines del “Principado”.  Amás, l’estudiu presentáu pa esta nueva fase nun cumple los requisitos llegales pa ser aprebada, al faltar na solicitú un plan de restauración y al nun tar evaluaes les compatibilidaes urbanístiques nin l’impautu ambiental, documentos toos llegalmente precisos pa un permisu d’esta triba.

Agora mesmo hai n’Uviéu ocho canteres actives pente les que s’alcuentren les mayores d’Asturies.

Redaición InfoAsturies

This work is licensed under a Creative Commons Attribution 4.0 International License.