• Portada
  • >
  • Conceyos
  • >
  • Asturies escontra la violencia machista: Actos na Selmana escontra la violencia faza les muyeres

Asturies escontra la violencia machista: Actos na Selmana escontra la violencia faza les muyeres

  • 20 Payares, 2018

Los actos del Díi Mundial contra la Violencia faza les Muyeres espárdense per cuasi tolos conceyos asturianos y a lo llargo de cuasique dos meses, con un total de más de doscientes actividaes pente xornaes, charres, marches, conciertos y otros actos, entamaos col envís de concenciar a la población de qu’esti problema afeuta a tolos estamentos sociales y espeyando la refuga del Pueblu Asturianu a la violencia contra les muyeres y los menores

Esti domingu 25 de payares ye’l díi Mundial contra les violencies sobre les muyeres y nesi marcu tan teniendo llugar delles actividaes en cuasi tolos conceyos asturianos.

Seique la presentación oficial  de la campaña, que tendrá llugar na sala de Cámara del auditoriu Príncipe Felipe, n’Uviéu, nun sedrá fasta’l xueves 22, dalgunos entamaron ya anantes de tiempu, comu en Piedres Blanques, onde yá’l díi 6 cellebróse la conferencia col entítulu ‘Sofitu social pa francer col maltratu. Un recursu a potenciar’, faciéndose entrega de los distintivos a los establecimientos que participaron na primer edición de la formación sobro violencia de xéneru pa comercios. El díi 15 presentóse’l curtiu “Ente cero y menos un” y el Conseyu de la Muyer istaló una mesa informativa nel mercaín de Piedres Blanques. La programación en Castrillón complétase col festival solidariu polos drechos de la reciella, que se cellebrará’l 23.

N‘Avilés el programa d’actos arrancó’l martes 20 a las 12:30 hores con una visita guiada a la esposición “Muñeques”, de Sergio Sabini Celio, alegatu escontra la violencia de xéneru, que se podrá visitar dica’l 24 na Sala d’Esposiciones de la Casa Municipal de Cultura.  El vienres 23 dende les 9:00 hores, el Hotel NH Palacio de Ferrera acoyerá la I Xornada d’Atención Sanitaria en Violencia de Xéneru y pela tardi tendrán llugar les Lletures Revindicatives contra la violencia faza les muyeres por moces d’estremaos proyeutos del Serviciu de la Mocedá, nel Salón de Receiciones del Conceyu d’Avilés.  El domingu 25 a les 12:00 hores habrá una concentración silenciosa na Plaza d’España, en recuerdu de les víctimes; el martes 27 tendrá llugar, nel centru de Servicios Universitarios d’Avilés, un alcuentru con xóvenes: “Videoxuegos, redes sociales y xéneru” y pa finar, el miércoles 28  la Casa d’Alcuentru de les Muyeres acoyerá l’actividá “Tres canciones, tres cuadros contra la violencia faza les muyeres”.

Güei, en Martimporra (Bimenes) cellebraráse un Alcuentru con Madame Berthé, esperta en xéneru y emprendimientu de la Universidá de Bamako (Mali), al que siguirá una actuación teatral del grupu llastrín “Les Tres Lluces” representando les obres “L’oculista de la vista” y “Pa qué queremos homes”.

De Corvera (Les Vegues) saldrá esti sábadu la XI Marcha comarcal escontra la violencia machista.

La Cuenca’l Nalón suspende esti añu la so tradicional Carrera Solidaria escontra la violencia de xéneru, pero nel so llugar el díi 24 la reciella llangreana de primaria, secundaria y bachiller participará n’actos de refuga frente a la violencia de xéneru, con un actu cientral nel Parque El Dorado nel que los escolinos  lleerán un manifiestu. Amás, el domingu 25 llámase a participar na Marcha solidaria dende l’Ayuntamientu de Langreo en Sama fasta La Felguera, amás de cellebrase un Conciertu solidariu nel Nuevu Teatru de La Felguera a favor de les víctimes del maltratu.

En Xixón la ciudadanía ta convocada tamién el 25 a les 12:30 nel Paséu de Begoña, a un actu de concentración y refuga escontra la violencia de xéneru y n’homenaxe a les muyeres y menores victimes d’esti caberu añu.  Un díi anantes podrá asistise de baldre al taller d’autoproteición pa muyeres nel Palaciu Municipal d’esportes.

N’Uviéu sedrá onde más sero finen los actos venceyaos a esti díi, col conciertu Me Too escontra les agresiones sesuales el 21 d’Avientu, nel Auditoriu Principe Felipe y la Xornada de bones práutiques de los cientros asesores de la muyer, el 19. Previamente, los díis 28 y 29 de Payares desendolcaráse n’Uviéu el cursu “Contestu y metodoloxía d’intervención con presones abellugaes ya inmigrantes”, destináu al presonal implicáu nel protocolu interdepartamental escontra la violencia sobro les muyeres, el 13 d’Avientu la xornada “Violencia de xéneru y discapacidá” y la conferencia “Pautu d’estáu escontra la violencia de xéneru y menores”, el 15.

La rellación d’actos cientraos nesti díi podría seguir fasta los más de doscientos convocaos, polo que nun ye posible recoyelos toos nun solu artículu, pero l’abondancia d’ellos da una idega de la importancia que a la defensa de la muyer se da n’Asturies y del firme compromisu que la sociedá asturiana tien pa finar con esta llácara.

Nuria Prendes

 

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

This site uses Akismet to reduce spam. Learn how your comment data is processed.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies