La lleción que mos dieron los rapacinos d’Alcoa

  • 19 Payares, 2018

 

Respigueme…

Venía de participar nun magüestu escolar de los más completos, con sidre, castañes, tallerinos, xuegos y un xiringüelu multitudinariu qu’enllenó’l patiu del colexu avilesín de cientos de rapacinos colos brazos n’alto. Prestoso.

Sicasí, nun pude evitar torcer el focicu cuando los profesores decidieron que’l meyor “fin de fiesta” pal casu yera la disco-reggaeton, ensin que faltare’l “Despacito” nin el “súbeme la radio”, xunto con otres de lletra dudosamente procedente. Nun fui la única en torcelu: pas y mas participantes na folixa miremos pa los llaos estrañaos d’una música tan pocu afayaiza; pero nun diximos res.

Por supuesto, la reciella nun quería subir pa clas, asina qu’un de los profesores echó man d’un d’esos trucos que tou bon mayestru tien siempres a puntu: “venga, cancia-y vosotros agora una, mientres subís, la que querais”.

El canciu entamó al fondu, dende un garrapiellu de terceru o cuartu cursu y espardiose pel patiu en menos d’un menutu. Como una sola voz, glayando al altu la lleva y escaeciendo despacitos, la reciella avilesina subió les escaleres al ritmu del so cantar:

“Alcoa nun se cierra, Alcoa nun se cierra”

Hai futuru.

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

This site uses Akismet to reduce spam. Learn how your comment data is processed.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies